Sugbuanong mga tinun-an nga nakakuha sa kontrobersiyal nga nursing board examination ug ilang mga ginikanan kusganong niawhag sa Professional Regulation Commission (PRC) sa pagpapanumpa na sa tanang nakapasar nga mga tinun-an sa labing daling panahon. Gipaabot silang mopabaha sa ilang mga mensahe di lang sa kadagkoan sa PRC kon dili apil na usab sa mga sakop sa duha ka balay balaoranan nga maoy kusganong niawhag sa pagbasura sa sangpotanan sa pasulit ug pagpasiugda og bag-ong board exam.
Ang mga nanambong sa Kapamilya Media Forum sa DYAB Abante Bisaya ug Sky Cable nagkauyon nga ang pagpahigayon og bag-ong pasulit usik sa panahon, usik sa kuwarta ug di makiangayon ngadto sa kinabag-an sa mga tinun-an nga wa makapahimus sa nabutyag nga leakage sa pipila ka mga pangutana nga gituohang gikan sa duha ka sakop sa Board of Nursing (BON) nga gisuspenso na samtang gitun-an pang mga kasong kriminal ug administratiba batok nila.
Gipaluyohan sila sa Sugbuanon nga pangu sa BON niadtong 1991-1992, si Dr. Delia Mediano, kinsa nitambong sa sinemanang tapok sa kamatuoran sa SM City Entertainment Plaza. Si Shirley Alinsonorin, laing Sugbuanong kanhi sakop sa BON nga nakaalagad sud sa duha ka termino gikan sa 1990 hangtod sa 1998, masaligon nga kon maningog lang ang mga tinun-an ug ang mga ginikanan way laing mahimo ang PRC ug ang Kongreso gawas sa pagpaminaw nila.
Ang presidente sa Philippine Nurses Association Cebu Chapter, si Dr. Lidovina Alino, nitataw nga di maapektahan ang kaligdong sa nurses bisan pa ning bag-ong kontrobersiya. Matod niya nga nahiagom sab sa samang bulilyaso sa nangaging katuigan ang ubang mga propesyon, apil na ganing abogasiya. Ang mahinungdanon mao nga gihimo nang mga lakang pagpatigbabaw sa kaligdong sa sangpotanan sa board exam ug sa tibuok propesyon.
Sila si Mediano ug Alinsonorin gipatabang sa PRC paghusay sa kontrobersiya sa nangaging mga semana. Pulos sila kumbinsido nga, sukwahi sa mga pasangil, wa magpabaya ang PRC pagtino sa leakage, kinsay responsable ini, unsaon pagpalingkawas ang kinatibuk-ang sangpotanan sa pasulit gikan ini, unsaon pagpanalipod ang kinabag-an sa mga tinun-an nga wa maapil sa binuang ug pagtino nga kasilotan ang tanang nahilambigit, nga napamatud-an sa dinaliang pagsuspenso sa duha ka sakop sa BON.
Matud ni Mediano nga 90 sa 100 ka pangutana sa Test 5 ug 20 sa 100 ka pangutana sa Test 3 nitukma sa leakage nga gipresentar sa mga nangreklamo sa PRC. Nipasabot siya nga igo na nga wa iapil sa PRC pagkuwenta sa grado ang tubag ning maong mga pangutana. Laing sukaranan sa iyang pagsalig sa kaligdong sa sangpotanan sa board exam mao nga 42% ra sa mga tinun-an ang nakapasar karong tuiga, mas ubos kon itandi sa passing percentage sa niaging 10 ka tuig.
Email: leo_lastimosa@abs-cbn.com