Usa ka dakong kalihukan kini busa angay lang nga atong pangandaman og maayo aron magmalampuson kini.
Ang wala pa tingali mahibaw-an sa ubang tawo mao nga dinhi usab ipahigayon ang 23rd Asean Inter-Parliamentary Organization (AIPO) convention sa sunod buwan (Septiyembre 10 ngadto sa 15).
Kining AIPO convention pagatambongan kini sa mga parliamentary leader gikan sa napulo ka mga nasud nga nahisakop sa Asean.
Sa ato pa duha ka dagkong tigum sa mga lider sa Asean ang masaksihan sa Sugbo ning tuiga.
Dili lang ang atong mga opisyal ang mangandam alang niining duha ka mahinungdanong kalihukan kundili usab ang katawhang Sugbuanon.
Suportahan nato ang atong mga opisyal kay ang kalampusan niining duha ka kombensyon mohatag og dakong kadungganan ug garbo sa Sugbo. Ug ang kapakyasan niini mohatag og dakong kauwawan kanatong mga Sugbuanon.