Kinsay molimpiyo sa eleksiyon?

Sa usa ka forum sa Cagayan de Oro nga gipatawag sa usa ka Malacañang-controlled Congressman, ug tinambongan sa mga civic-religious leaders, usa sa mga isyu nga gihisgutan mao ang umaabot (kon mahinayon man) nga eleksiyon sa sunod tuig.

Suma'a pa sa atong tinubdan, nagpakitag pag-uyon ang mga nanambong sa tanang mga gipahay'g ni Mr. Congressman, hangtud nga usa ka vocal kaayo nga pari, mitindog ug namahayag nga kon kadudahan ang miaging eleksiyon, kon hugaw ang pagkapili ni Mr. Congressman, unsaon man niya pagpasiugdag usa ka malinis nga eleksiyon?

Iyang gisugyot nga ang mga incumbent karon nga naglingkod sa tagsa-tagsa nila ka mga katungdanan, kansang pagkapili, hugaw kaayo, di lang unta kono mag-apil-apil, ug di molansar karong eleksiyona (kon mahinayon man), aron di sila maghugaw-hugaw sa maong eleksiyon, ug aron sa makausa pa, makatilaw intawon tag usa ka malinis nga eleksiyon.

Nanglipaghong kuno si Mr. Congressman. Dinhi ra kutob ang atong sugilanon. Wa'a na mo-elaborate ang atong tinubdan.

Kon mahinayon man, kinsa may molimpiyo sa umaabot nga eleksiyon? Ang Comelec? Ang Namfrel? Ang mga magtutudlo? Ang mga gobernador ug mga mayor? Ang mga Barangay Captain? Ang mga Obispo nga gidudahang midawat og sobre? Ikaw, Dro, nga for sale man?

Kinsa ang molimpiyo, ug unsaon paglimpiyo sa umaabot nga eleksiyon (kon mahinayon man)? Kon di ni matubag, maayo pag di mag-eleksiyon? Kon di ilisdan si Abalos, kon pabalikon si Garci sa Comelec, kon magpapalit gihapon si Pedro, ug kon silang mga kandidato mismo maningkamot panikas, unsaon man nato pagseguro nga ma-linis ang umaabot nga eleksiyon, kon mahinayon man? Maypag di mag-eleksiyon, di ba? Mosugot kaha sila Dro nga limpiyohon ang eleksiyon?

Komentaryo? Text 0916-6488650