Magpatuong higala

Kon ikaw adunay igsuon o kabanay nga nanarbaho sa gawas sa nasod, basaha kini aron ka makabantay. Maoy sagad nga mabiktima niining maong estilo sa modus operandi kadtong mga tawo nga adunay mga sakop sa pamilya o kaha paryente nga nanarbaho sa abroad. Gisulat ko kini aron kamo makabantay.

Ang estilo mao nga kon ikaw nahibaw-an sa mga suspek nga may sakop sa imong pamilya o kaha paryente nga mi-abroad aron manarbaho, makigsuod siya kanimo ug magpatuo nga kauban siya sa imong anak o kadugo nga nanarbaho sa gawas. Maayo siyang manulti mao nga makadani ug makakombinser gayod sa iyang buladahon nga prospect. Ang iyang tuyo mao ang pagkuha sa imong simpatiya ug pagsalig.

Sa higayon nga mosalig ka na kaniya, mopahungaw na siya sa iyang tuyo. Patuohon ka niya nga nagtugon ang imong anak o paryente nga kauban niyag trabaho sa gawas nga ikaw pahatagon kaniya og kuwarta (dakong kantidad ang ibungat). Ang imo na kunong anak, igsuon o paryente nga atua sa abroad ang maantigong mobayad kanimo sa kantidad nga imong gihatag kaniya (sa suspek). Patuohon ka nga may utang ang imong kabanay kaniya. Ayaw gayod kamog tuo niini aron dili kamo mabiktima niining maong matang sa pangilad.

* * *

Sa laing bahin, ang tag-iya sa cellphone number 0910-4562593 nangayo sa opinyon niining ubos nga kolumnista mahitungod sa iyang problema sa iyang anak. Badlongon man god (kuno) ang iyang anak, nayabag sa video karera ug mangawat na sulod sa ilang balay ug ingon man sa laing kabalayan. Nahasol siya pag-ayo sa iyang anak nga nagpabadlong.

"Mangayo ko og tambag nimo. Maayo ba nga amo na lang ipapriso ang among anak aron maleksiyon siya?" Pangutana sa atong texter.

Kay ako may gipangayoan nimo og tambag, ako moingon nga anaa ra kana kanimo. Kon imo siyang ipapriso, para nako, dili kana daotan kay kana nagpakita lang nga wala ka mokonsinter sa salawayon niyang binuhatan. Buhata ang gituohan mong makaayo ug makatul-id sa balikong taras sa imong anak.

* * *

(Sumbong ug reklamo? Text sa 0910-8105522)