Langay sa NHA

Asa naman diay tuod mapunta ang P100 milyones nga gisaad ni Presidente Gloria Arroyo ngadto sa mga Mandauehanon nga gamiton alang sa katukoran sa medium-rise housing project sa Looc, Mandaue.

Nahinumdom kamo nga niadtong Nobiyembre sa 2003, si Arroyo miduaw sa Mandaue ug mao pa ang nangunay og apod-apod sa titulo sa yuta sa mga benepisyaryo sa New Resettlement Housing Project sa Canduman.

Apan kutob ra gyud sa pagpang-apod-apod sa titulo, ang yuta wala pa gyud intawon mapusli sa 400 ka mga pamilyang nasunogan tungod sa paglangaylangay sa National Housing Authority pag-release sa P100 milyones nga alang unta sa maong proyekto.

Ang nakaparat pa gyud kay aduna na diay unta kanang maong kantidad sa pundo, apan mura og gilangaylangay lang og pagawas sa mga kadagkuan sa NHA.

Ipasangil lang sa ilang paglangaylangay ang pagpangayo og dugang nga mga rekisitos.

Kun akoy Mayor Thadeo Ouano, dili niya lugakan ang NHA pagpaningil sa P100 milyones. Siyay amahan sa Mandaue busa angayan niyang panalipdan ang interes sa iyang mga konstituwente pinaagi sa paggukod nianang mga langayang mga tinugyanan sa NHA nga nagpugongpugong pagpagawas sa maong kantidad.

Apan maayong susihon ni Tedy kun wala ba kahay politika nga nalambigit niining paglangaylangay og pagawas sa maong pundo.

* * *

BIN. Gihatagan og "break" ni Mayor Tomas Osmeña ang mga sakop sa Barangay Intelligence Network (BIN) nga makamatuod sa ilang ka-epektibo sa komunidad pinaagi sa pagdestino kanila pagbantay sa Cebu City Hall hulip sa mga blue guards.

Apan wala uroy maulaw si Tomas ug ang mga konsehal nga nagpahambog nga "volunteer" lamang ang mga BIN nga magbantay sa city hall.

Ibutang nato nga boluntaryo lang ang ilang pagserbisyo, apan maayong dili usab mo-abuso sa maong oportunidad ang lokal nga kagamhanan sa siyudad pinaagi sa paghatag lamang kanila og kapin sa P1,000 nga allowance bugti sa risgo nilang trabaho.

Kun magkasabot lang ang mga sakop sa BIN ug ang city hall sa maong kantidad sa allowance, walay problema.

Apan ang gikahadlokan ko lang kun makat-on og binuang ang mga sakop sa BIN hangtod malambigit na lang hinuon sa unsang klase sa panguwarta diha sa city hall tungod sa kagamay sa ilang allowance.



Timan-i baya mga pamilyado kasagaran sa mga sakop sa BIN.

Ang maayo, kadtong budget nga gibayad sa kontrata sa mga blue guards, bisan katunga lang niadto isuhol og sakto sa mga sakop sa BIN.

* * *

CITOM. Dili na ko makapaabot nga masilotan pa kadtong polis sa Traffic Section ug mga sakop sa Citom nga gipasanginlan sa mga drayber og traysikad sa San Nicolas, Sawang Calero ug Pasil nga dili patas kun manakop ug nanguwarta pa niadtong ilang madakpan.

Maayong masayod kamo nga tungod sa "camaraderie" diha sa Traffic Section, kanunay'ng nagtapion kang SPO4 Jesus Tamayo ug sa mga sakop sa Citom ang hepe sa Traffic Section nga si Chief Insp. Marlou Martinez.

Sa sunodsunod nga follow-up nga gihimo sa Banat News, kanunay'ng manalipod si Martinez kang Tamayo ug ipasangil lamang ang wala pagpatim-aw sa mga reklamanteng mga drayber sa traysikad.

Gipasangil ni Martinez nga dili na interesado ang mga reklamante. Apan ingnon ko ikaw sir, nga interesado kaayo ang mga drayber sa traysikad nga mopatim-aw, apan ang inyong buhatan maoy dili interesado nila.

Giingnan mo lang sila nga ipatawag sa imbestigasyon, apan hangtod karon walay notisya nga naabot nila aron patambungon sa inyong meeting.

Sa laktod, inyong giluto ang imbestigasyon ug giilad-ilad lang ninyo nga nagtagad kamo sa reklamo sa mga pordoy'ng traysikad drayber.

Moingon pa si Martinez nga nagkinahanglan siya og formal complaint. Unsa man nga formal complaint ang iyang gipangita? Diha ko sa atubangan ni Jun Israel nga nagsulat sa tanan nilang pasangil batok ni SPO4 Tamayo ug mga Citom enforcers.

Akoy naghatag nila sa ballpen ug bond paper ug dinhi siya sa buhatan sa The Freeman ug Banat News nagsulat.

Ang sulat gisumiter ngadto ni Konsehal Sylvan Jakosalem, busa hain naman diay kadtong maong sulat, sir Martinez?

Unsa pa man nga formal complaint imong gusto?

Basin gusto nimong langaylangayon ang mga traysikad drayber nunot sa ilang ka-bise sa pagpamasahero, hangtod makalimtan na lang ilang reklamo?

Kanang imong pasiatab nga dili tinuod nga pamuhian sa imong mga tawo ug sa mga taga Citom ang mga traysikad nga may markang GBY kay duna gani tulo sa inyong compound sa traysikad nga aduna niining markaha nga wala ma-release.

Mao gyud nay akong gikahibulong ana sir Martinez nganong hangtod karon wala gyud na ma-release nga hilabihan man kadato sa tag-iya ana nga among silingan sa San Nicolas-Proper.

Ang nag-ilaid sa kalisud nga drayber sa traysikad nga igo lang nag-abang og yunit makalukat dayon sa yunit nga madakpan, unya kana si Mr. Gerry Antigua dili makalukat anang tulo niya ka yunit?

Imposible!

Ang akong nasabtan gipabilin lang na diha ang tulo ka yunit aron ipalutaw ninyo nga dili tinuod nga inyong gipaboran kanang mga traysikad nga may markang GBY.

Klaroha na uy!