EDITORYAL — Pangutana sa kadaghanan

Daghang mga tawo nga nakakita sa trabaho pagkakaron sa Cebu International Convention Center (CICC) diha sa Mandaue ang nakapangutana: "Mahuman kaha ni sa 12th Asean Summit unya sa Disyembre?"

Dili katingad-an ang ilang pangutana nga dunay nagpahipi nga pagduhaduha - kay sa pagsuwat nato ning editoryal wa pa ganiy klarong haligi nga nanindog sa construction site.

Apan mipasalig si Gobernador Gwen Garcia ug ang mga konstruktor sa proyekto nga mahuman gayud kini pag-abot sa Nobiyembre ug magamit lagi gyud kini sa gipaabot nga Asean Summit.

Di lang ta molalis sa ilang pagkamasaligon kay sila may nasayod sa dagan sa trabaho. Sa iningles pa, hatagan ta sila og "benefit of the doubt". Ug manghinaut nga matuman gayud ang paghuman sa proyekto sa wa pa moabot ang dakong konbensyon.