Ang iyang text nagkanayon: "Taga Carcar ko. Kada adlaw ko magsakay og mini bus nga mobiyahe sukad sa Cebu City paingon sa Carcar pero molahos sa Sibonga. Ang akong reklamo kay sobra ra kaayo ang ilang pangayo og plite. Ang uban kay tag P30 ra pero kini nga bus tag P40 gyod. Unya ang konduktor isog kaayo, panaogon ming pasahero kon dili mohatag og P40." -- 0920-4815109
Dugang pa sa maong texter: "Ila man dayong kolektahon ang plite diha pa sa Pardo. Unya kon dili ka mahatag og P40, pakanaogon ka. Unya kanang ilang ticket morag ilang buslot-buslotan. Peke man kana kay way TIN. Klaro gyod nga wala marehistro sa BIR kay akong nabantayan nga walay TIN. Unya puno pa gyod sa barog ang mini bus. Huot kaayo sulod sa sakyanan."
Dili lang una ko mokomentaryo mahitungod niining maong sumbong. Wala man god ko masuheto kon pila gyoy plitehan gikan sa Cebu City paingon sa Carcar. Nindot unta kadto kon gitug-an pa nimo ang ngalan o plate number sa maong mini bus aron dali ra kining ma-trace sa atong mga awtoridad.
Ang maayo mong buhaton mao nga i-refer ang imong reklamo ngadto sa buhatan sa Land Transportation Office (LTO) kay nagtuo ko nga dako silag mahimo bahin niining maong problema. Dili maayong i-tolerate lang nato ang binuhatan sa mga driver ug konduktor nga magpabadlong.
Pila man gyod diay ang plitehan sa Carcar gikan sa Cebu City segun sa nahitala sa taripa? Kon P30 ra, dako ra kaayong patong ang P10. Pero bisan pa kahag P40 ang plitehan sa maong rota, hasol kaayo ang ilang gihimo nga pagpakanaog sa mga pasahero. Mao nga ayaw gayod kini ninyo pasagdi. Ipaabot gayod ang inyong reklamo ngadto sa LTO aron madisiplina kini sila.