SONA ni Gloria

Kon nagkinahanglan si Pres. Arroyo og 16,000 ka mga polis ug mga sundawo aron luwas nga makahimo sa iyang tinuig nga State of the Nation Address (SONA) atubangan sa iyang mga dumadapig sa Kongreso, dunay dakong suliran sa seguridad ang nasud. Kon nagkinahanglan ang presidente og 16,000 ka mga polis ug mga sundawo ug kaliboan ka hinakot nga mga sibilyan aron pagmatuod nga gipaluyohan siya sa kinabag-an sa katawhan, dunay dakong buslot ang kaligdong sa iyang pamunoan.

Kon kinahanglang isalida sa presidente ang mga kampeyon sa sinumbagay ug paguwapahay aron pagmatuod nga nagmadaugon ang kampanya batok sa kakabos, dunay dakong haw-ang ang gipagawal nga nasudnong kalamboan. Kon nagkinahanglan siya sa mga idolo nga may bakos, medalya ug korona ug high tech nga visual aids aron pagkumbinser sa katawhan nga nagmadaugon ang iyang pamunoan, dunay higanteng sukaranan ang pagduda nga inay paraiso lawom nga bung-aw ang iyang gitinguhang padulngan sa nasud ug sa katawhan.

* * *

Ang labing sipa nga kamatuoran nga di mapahilom sa kapin sa usa ka takna nga SONA masaksihan kaliboan ka kilometro gikan sa Batasang Pambansa Complex, sa nagusbat nga Lebanon, ang kanhi mutya sa tungatungang sidlakan: Dul-an sa 30,000 ka Overseas Filipino Workers (OFWs), nga apil sa giilang bag-ong mga bayani tungod sa dako nilang natampo pagpalambo sa ekonomiya, di mapalingkawas gikan sa gubat nga di ila, kay kon unsa kaabunda ang mga ulog-ulog mao sab kanihit ang tinuoray'ng pagpakabana sa mga haligi sa taphaw nga pamunoan.

Si Pres. Arroyo wa gani magtagad pagpasabot nganong samtang nagpaibog sa binilyon ka pesos nga natigom gikan sa bag-ong mga buhis nga iyang gipahamtang igo ra mang nagpakilimos sa kaluoy sa adunahang mga nasud nga ihapit na lang og tangkil ang OFWs kon may luna pa sa ilang mga barko, ayroplano ug mga sakyanan sa yuta? Kon tinuod silang mga bayani, nganong sama sa naandan igo ra mang gilawog ang OFWs sa mga langyaw nga di managana pagpahimus sa ilang kahuyang ug ka-way katakos pagpanalipod sa ilang kaugalingon?

* * *

Kon ang mayoriya sa OFWs-bisan nabungog sa way puas nga bombardiyo, nagkatibuwaag paglikay sa nagtuasik nga mga bala sa nagkaguliyang nga mga manggugubat, ug nag-ungaw nga maangin sa bangis nga pinatyanay sa nagkasunging mga nasud-nipili sa pagpabilin sa Lebanon inay sa pagbalik sa ilang yutang natawhan, unsa na man diay intawon kapintas ang katimawa nga nalubngan sa gitalikdang mga pamilya nga gusto nilang haw-ason?

Kon bisan atubangan ning masulub-on nga talan-awon motuo gihapon si Pres. Arroyo sa matag bakak nga iyang gipabaha, kon magpalingla sa matag pakpak nga iyang gipamalit, kon mokalawat sa lapad nga pangilad nga iyang gipasiugdahan, kon maglaom sa bag-o ug mas sanag nga ugma nga iyang gisaad, angay tang manguros, moitlib sa atong wait ug mohangad sa kahitas-an.

E-mail: [email protected]