Mirisi ug makagaba

Ang tanang nakatilaw sa kabangis, kahasol, kabastos ug kamakalalagot sa binuang nga text messages nakasabot sa dakong kalipay nga gibati ni Cebu City First Lady Margot Osmeña ug sa iyang banang si Mayor Tomas Osmeña sa pagka konbikto ni Jonah John Rodriguez sa kasong pagpanghulga nila pinaagi sa text. Gawas nga nakaangkon og hustisya sa pait nilang kasinatian, nakaginhawa sab og luag. Tungod tingali sa kalig-on sa kaso, pipila ray nakaamgo ini, ug ang mayor mas nakatugkad kay sa iyang asawa, sa kangil-ad sa implikasyon kon napilde pa sila: Nga nagbuotbuot lang sila, salig nga nagtungkawo sa gahom, pagpasangil sa wa intawoy ikasukol nga batabata sa ilang politikanhong kaatbang.

Gawas nga naluwas sila niana, karong nahuman nang husay sa kaso, makapangangkon pa ang magtiayong Osmeña og mas dakong kahulogan sa sangpotanan: Nga ang ilang pribadong kadaogan gisaw-an sab, ug mahimong makahatag og kadasig sa pagpanalipod sa ilang mga katungod, sa uban pang mga biktima sa pag-abuso sa modernong teknolohiya.

* * *

Ang mga nagsunod sa higanteng bugno nilang Mayor Osmeña ug kanhi mayor Alvin Garcia, nga nakasaksi sa nagbukal nga balikasay ug insultohay sa lunod-patay nilang mga dumadapig, wa makugang dihang gikiha ni Margot si Jonah John. Kinsa maoy nitumaw nga labing loyal sa mga dumadapig ni Garcia ug maoy labing isog nga nisungasong sa mas gamhanan nilang kabangga.

Tungod tingali sa iyang kabatan-on, wa pang kaamgo si Jonah John nga usa sa labing mahinungdanong leksiyon sa paglaban og politiko mao ang di pagpalabi, nga bisan unsa nimo kabilib sa kandidato mater-meteran gyong pagpaluyo, kay kon magkauli ang nag-away nga mga politiko, ikay labing makaluluoy. Sa kaso ni Jonah John, wa magkauli silang Garcia ug Osmeña. Apan nahutdan na lang og bala nga ikasukol ang iyang amo.

* * *

Maong mirisi si Jonah John. Iyang amo wa na gani maghisgot motabang pa ba pagbayad sa P200,000 nga multa nga gipahamtang sa korte. Ang taphaw ganing paglaban ni Garcia niya atol sa husay, nga bisan ang huwes napugos pagtabang og giya sa nagsaag-saag nga pinangutan-an sa kanhi mayor dihang gipresentar sa prosekusyon isip saksi si Margot ug hasta ang kaubang abogado sa depensa nibiya kay wa nang kasabot sa dagan sa kaso, mahimong nakatampo sa pagkahimo na niyang hingpit nga kriminal.

Wa tang kasinati sa nahiagoman sa magtiayong Osmeña sa pagkadawat nila sa way kinutobang text messages ni Jonah John, nga way gipiling oras, bisan tungang gabii. Apan ang paghudlat sa mayor nga ipataktak sa trabaho ang konbiktado, nga kuhaan sa suholan kon di mataktak ug nga babagan bisan asa aron di na katrabaho, bisan kon ang iyang asawa gipasidunggan sa kalamposan paghatag og laing kahigayonan sa mga nitipas sa tarung nga agianan sa kinabuhi, nasobrahan na. Makagaba.