Ubos sa kontrobersiyal nga Juvenile Justice and Welfare Act, nga bag-ong napasar sa Kongreso ug gipirmahan ni Pres. Arroyo, ang mga 18 anyos paubos nga makahimo og krimen-bisan ang labing bangis nga pagpatay, pagpanlugos ug pagpayuhot sa drugas - di na mahimong dakpon, ikiha ni bilangguon. Kun labaw sa 15 apan wang kaabot og 18 anyos, kinahanglan pang pamatud-an sa prosekusyon nga nahibawo ang bata nga sayop ang iyang gihimo.
Mao ni sukaranan sa kinabag-an sa mga tigpaminawan sa DYAB Abante Bisaya sa paghulagway sa bag-ong balaod nga makapasamot lang sa kriminalidad ug inay manalipod makasugba na hinuon sa dugang kabataan ngadto sa mas bangis nga mga krimen kay mamahimo na man unya silang labing sayon nga hinagiban sa mga sindikato. Ang mga niapil sa among inadlawng "Pulso" niingon nga kun napakyas pagbadlong sa mga batang kriminal ang pagpahamtang sa hingpit nga gibug-aton sa balaod batok nila, mosamot sila pagsiaw kun igo lang maymayan ug hapuhapon.
Ang mga abogada nga nanambong sa Kulokabildo.Com sa DYAB Abante Bisaya, silang Joan Saniel-Amit sa CLB ug Marigen Dominique Pamaran-Agustin sa Cella, nidason sa pasalig ni Senador Francis Pangilinan, ang nangamahan sa balaod, dihang ako siyang gisumbongan ning labing dakong kabalaka sa nagkalainlaing sektor sa Sugbo, apil na sa mga maghuhukom ug prosecutors: Dunay igong balaod nga manalipod sa kabataan gikan sa pagpahimus sa banggiitang mga kriminal. Nipasidaan si Agustin nga ang paggamit sa mga bata makadugang sa silot sa krimen nga mahimo sa mga dagko.
Malaumon silang Amit ug Agustin nga ang balaod makapabuka sa mga mata sa tanang hingtungdan sa kamatuoran nga mas katabangan ang mga bata kun, inay ibalhog uban sa nanggungis nang mga kriminal, subayon ug tubagon ang gamit nga mga hinungdan sa ilang pagkasaag ug sagakayon sila sa nagkalainlaing kahugpongan sa kagamhanan ug pribadong sektor aron mamahimong mapuslanon nga mga sakop sa katilingban.
Dakong gimbuhaton ang paghaw-as sa kabataan gikan sa kaalaotan. Matud ni Emma Patalingjug, senior welfare officer sa DSWD 7, kinahanglang bansayon ang dugang social workers (nga kuhaunon pa) aron moduma sa mga sentro (nga tukurunon pa sa local government units) nga moamuma sa mga bata. Matud ni Abeth Cuizon sa Commission for the Welfare and Protection of Children sa Cebu City government, giwaling nilang mga paningkamot gikan sa pagpalambo sa Operation Second Chance, ang mabasiyo nang bilanggoan sa mga bata, ngadto sa pagpangandam pagsawo nila.
Sa mga dinapit sa sinemanang tapok sa Ayala Activity Center, si Barangay Kapitan Joel Garganera mihatag og labing makapatandog nga mensahe: Kun ang matag usa nato mopakita og paghigugma ug pagpakabana - inay molikay, mangingking o mamanghag - sa naglago nga kabataan sa kadalanan, mas sayon nga maluwas ang ila ug atong ugma.
Email: leo_lastimosa@abs-cbn.com