Hala pangdakpa!

Sa ngalan sa mga kawani sa The Freeman-Philippine Star, akong pasalamatan ang among management - ilabi na si Mr. Miguel "Good News" Belmonte nga maoy presidente ug chief executive officer - tungod kay wala niya sipyata ang gipaabot sa mga kawani.

Ang tanang kawani sa The Freeman gihatagan ni Mr. Belmonte ug "across the board" nga usbaw sa sweldo bali'g P500 ang buwan ingon man libre nga medical insurance. Gipamatud-an gihapon ni Mr. Belmonte ang iyang pagka Mr. Good News.

Matag higayon nga dunay okasyon ang The Freeman, sama sa Christmas party ug sama kagahapon nga anniversary, duna g'yoy Good News si Mr. Belmonte sa mga kawani nga mahinangpong magpaabot kaniya nga mohatag og pakigpulong.

Ingon unta niini ang angay'ng buhaton sa ubang agawon, nga dili na magpaabot nga magbagolbol ang ilang mga kawani kon kanus-a ipatuman ang gimando nga usbaw.

Kami gani nga dili na man unta angay'ng hatagan sa maong usbaw kay subra man kaayo sa minimum ang among sweldo, apan ang among management wala magduha-duha sa paghatag og increase sa sweldo.

Kon imong kwentahon, ang P18 nga usbaw sa sweldo nagkahulogan nga P468 ang madugang sa sweldo matag buwan sa mga trabahante og dagkong kompaniya dinhi sa Metro Cebu, apan si Mr. Belmonte mihatag og P500.

Balikon nako, dili kini usa ka pagpanghambog nga nausbawan ang among sweldo human ang Regional Tripartite Wages and Productivity Board mimando og wage increase kaniadtong Domingo.

Ang ako mao nga ang gihimo ni Mr. Belmonte kakutloan unta og pagtulon-an sa ubang mga agawon nga dili sila magpanuko paghatag og usbaw sa sweldo sa ilang mga kawani aron matabangan nga dili sila kaayo magping-it sa kalisud.

* * *

Kay anniversary man sa The Freeman kagahapon, tuguti ko nga akong lingion pagbalik kon ngano nga nasulod ako sa The Freeman isip usa sa mga staff reporters.

Siyam ka tawo, pulos mga lalaki gipangpatay pinaagi sa tigbas didto sa sitio Iba, barangay Lagtang, Talisay kaniadtong 1987. Kon wala ko masayop, ang petsa niadto Agosto 27.

Ang grupo nga Sagrado Corazon Señor nga naila kaayo nga Tadtad, maoy gitumbok nga responsable sa maong pagpamatay kay ang mga biktima gikatahapan nga mga rebelde.

Hilabihan kabukid sa maong dapit ug mao nga ang mga reporters gihakop sa dili tiaw nga kahadlok pagtungas aron mokutlo og report sa maong panghitabo.

Dunay usa ka volunteer reporter nga karon kapitan na sa barangay, didto sa tiilan sa maong bukid, apan mibalibad sa pag-uban nako pagtungas sa bukid.

Mao kadto, sa tanang reporters ako ra ang nakatungas ug nakahatag og tukma nga report. Reporter pa ko niadto sa DYMF vigilantes nga karon mao ang Bombo Radyo.

Kay wala man lagi'y nagpakaisog pagtungas sa maong dapit, mibulontaryo ko nga misuwat sa The Freeman sa maong balita, ug mao kadto ang sinugdanan nga nahimo akong reporter.

Gikan niadto, pinaagi sa pagpanglimbasog, kinaugalingon nga pagtoon sa mga balaod, police and military techniques sa paghimo og imbistigasyon, gitahasan ko sa The Freeman management nga mo-cover sa labing sensitibo nga assignment - ang hukmanan.

Ang tiknik nga modugay ka sa pagpanarbaho mao nga dili ka magligoy-ligoy ug ipakita nimo ang tanan nimong katakus aron sa pagtuman sa imong katungdanan.