Ang text nagkanayon: "Naa lang koy ireklamo. Kanang tapsilogan sa may Humayhumay Road sa Lapu-Lapu City, ba. Nag-inom mi diha one time. Unya nangayo mi og resibo. Masuko man. Mao diay nga masuko kay wa diay siyay resibo. Kadako nianang iyang tindahan unya wa siyay resibo? Daghan ra ba diha mga prostitute sa iyang tindahan. Mag-open na 6 PM." -- 0927-6393239
Gipatik kon kining maong text dili tungod kay kombinsido ko sa gisumbong sa atong texter kondili aron makabantay ang uban ug sa samang higayon masusi kon unsa kini ka tinuod. Akong klarohon nga wala pa ako motuo niining maong taho apan angayan gayod susihon sa mga nahingtungdan kon tinuod ba kini o dili.
Gihatag sa atong texter ang ngalan sa maong tapsilogan apan sanglit wala man nato makuha ang ilang habig, nakahukom kong dili lang una nato kini ibutyag sa hingpit in fairness ngadto sa tag-iya niini. Ako lang ihatag ang inisyal nga ngalan sa maong tapsilogan aron paghatag ninyog ideya. -- J.
Kon atong basehan ang text sa atong texter, makaingon gayod kita nga dili maayo ang serbisyo sa maong tapsilogan ngadto sa ilang mga kustomer. Tiaw mo nga masuko man kon mangayo og resibo ang kustomer? Katungod ug responsibilidad sa kustomer ang pagpangayo og resibo. Katungdanan ug obligasyon usab sa usa ka negosyante ang pag-isyu og resibo ngadto sa kustomer. Unya, nganong masuko man hinuon kining maong tapsilogan kon mangayo og resibo ang ilang kustomer? Kining pag-isyu og resibo nalatid sa ilang pagkuha og business permit.
Angayan usab tinuon ang alegasyon sa atong texter nga naay daghang prostitute sa maong tindahan. Unsa man kining maong prostitutes? Binuhi sa tag-iya sa tapsilogan? O anha lang dapit sa iyang tindahan maghulat og kustomer ug walay labot ang tag-iya sa tapsilogan sa operasyon?
(Sumbong ug reklamo? Text sa 0910-8105522)