Gubat o kalinaw!

Alang sa militar ug kapolisan sa Sugbo, bisan sa panganti sa Malakanyang sa gubat batok sa mga rebeldeng komunista, wa mausab ang ilang tahas-ang pagpapas sa NPA gikan sa Sugbo ug rehiyon. Matod ni Koronel Jefferson Omandam, tigpamaba sa Centcom, ang "all-out war" naa ra sa media kay kabahin gihapon sila sa paningkamot sa kagamhanan pagsulbad sa kalisod ug inhustisya. Sa iyang bahin, si Koronel Ronald Roderos, luyuluyong hepe sa PRO 7, nitataw nga di na bag-ong sugo ni Pres. Arroyo nga motabang sila pagukod sa mga rebelde.

Ang bugtong kalainan alang nila mao ang pagsalikway sa presidente sa sabutsabot sa kalinaw. Nga makiangayon lang, segun nilang Roderos ug Omandam atol sa Kulokabildo.Com sa DYAB Abante Bisaya, kay ang mga rebelde maoy nibiya sa panagsulti.

* * *

Apan si Jaime Paglinawan, chairman sa Bayan Central Visayas, nga dinapit sa samang tulomanon matag Lunes sa buntag sa Ayala Activity Center, nanalipod sa pagbiya sa mga rebelde sa sabutsabot. Matod niya gilapas sa kagamhanan pinaagi sa militar ug kapolisan ang mga kauyonan pagpatigbabaw sa tawhanong katungod sa naapiking mga hut-ong sa katilingban nga igo lang nakigbisog alang sa kaangayan.

Nisumbalik si Roderos nga ang labing dakong hinungdan sa pangluod sa mga rebelde mao ang pagdumili sa Pilipinas pag-awhag sa US pagbakwi sa pagtawag sa NPA nga "terorista." Si Paglinawan nipasangil nga ang kapolisan ug kasundalohan, inay manalipod sa katawhan, nagpagamit na man hinuon sa mga politiko ug lokal ug langyawng mga magpapatigayon paghasi sa mga mag-uuma ug mga kabos nga taga dakbayan nga makababag sa ilang mga pabrika, minahan, subdivisions ug golf courses.

* * *

Ang tigpamaba sa Artsidyosesis sa Sugbo, Msgr. Achiles Dakay, kinsa dinapit sab sa tulomanon, nipadayag og kahibung nganong gilusad sa kagamhanan ang hingpit nga gubat batok mga rebeldeng komunista ug mga rebeldeng sundawo apan lubay ug napulos lang palusot ug ulug-ulog ang pagukod sa mga utok sa vigilante killings sa Sugbo ug kasilinganang mga dapit.

Daling nipahibawo si Roderos nga gitukod nang "Task Force Usig" nga gipangulohan ni Heneral Avelino Razon pagsusi sa sunudsunod nga pagpamatay sa mga lider sa militanteng mga pundok. Nakapait, segun ni Paglinawan, kay wa pa gani kasugod ang imbestigasyon gisangyaw na sa kagamhanan nga NPA ra say niunay sa mga walhon.

* * *

Si Robert Go, gobernador sa PCCI alang sa Central Visayas, natagbaw sa kalamposan sa militar ug kapolisan pagbadlong sa NPA sa Sugbo ug rehiyon. Kini bisan sa pag-angkon ni CPPO Deputy Director Erson Digal nga nagpabiling kusog ang NPA sa midnorth.

All-out peace o all-out war? Si Roy Erecre, gipansanginlang pangu sa NPA sa Kabisay-an niingon sa akong pagtungas sa ilang kampo sa Bohol: "Samtang may dinaugdaog pang mga mag-uuma ug samtang may katagoan pa silang Chocolate Hills, di mapapas ang armadong pakigbisog.

* * *

Email: [email protected]