EDITORYAL — Walay diskuwento nga ihatag

Usa ka retiradong opisyal sa gobyerno kinsa usa na ka dakong masakiton ang nangutana ngari kanato kon luwas ba sa silot ang usa ka botika nga prangka-prangkang moingon nga dili kini makatuman sa balaod nga naghatag og senior citizen's discount.

Matud pa niining maong retiradong opisyal naay mga botika nga sa walay pag-ukon-ukon mobalibad sa paghatag og diskuwento kay matud pa nila barato na ang ilang mga presyo. Busa dili na kinahanglan pa nga diskuwentohan ubos sa Senior Citizens Law.

"Dili man tingali kini husto," matud pa sa gihisgotang retiradong kanhi opisyal sa gobyerno. "Dakong pagsupak kini sa balaod."

Husto usab ang maong kanhi opisyal sa kagamhanan kinsa usa na karon ka masakiton. Ang balaod naga-ingon nga diskwentohan ang kwalipikadong Senior Citizen, so diskuwentohan kini bisan pila pay price tag sa usa ka medisina diha sa bisan asang botika.