Growing old

Kamao gyud ang Ginoo. Wa'a gyud niya himoang permaninte ang tawo ning kalibutan. Kay kon di pa ta mamatay, hilabihan kaha natong gubota. Gubot man gani ta ron nga ma-wa'a ra ta ning kalibutan, unsa na kaha kon molungtad pa ta.

Samot gyud ang atong pagpamakak, pagpanikas ug pagpangawat. Di gud mamatay! Busa kamao gyud ang Ginoo. Hinoon, iya lang tang pasagdan bisag unsay atong buhaton kaylagi, iya man tang gihatagan og hingpit nga free will. Hinungdan nga ang uban nato, patuyang lang, morag wa'ay kamatayon.

Hinuon, gihatagan pa tag higayon nga maka-enjoy ning kalibutan. Wa'a sad diritsoag tiklo. Gipaagi una ta niyag katigulang, tingali pamasin nga makahinuklog pa ta kon unsa man ang atong mga binuhatan panahon sa atong kabatan-on.

Si kanhi Customs Collector Boy Odilao, mi-text kanato bahin sa growing old. Matud niya: Growing old is mandatory. Growing up is optional. Growing young is therapeutic. Growing in Faith is the best beauty treatment. Keep growing in the Lord.

Nindot, di ba? May pagkatinuod sad. Mao niining atong pangidaron, which is mandatory, maayo nga makabakwi kita gikan sa atong pagkabadlongon, gikan sa atong pagpatuyang, ug magpalig-on kita sa atong Pagtoo.

Laing text iyang gipadaa. Matud pa, bisag unsa kono ka lawom sa sapa, taga-dughan ra gyud ni sa itik. Tinuod sad, di ba, Dro? Nga bisag unsa kono ka lawom ug kabug-at sa problema, taga-dughan ra ni nato. Apan, kon lisud na gyud kaayo pas-anon ang usa ka problema, pangita konog itik, ug adoboha. Wagtang problema.

Niay laing text message. Dugay-dugay na ni, atong nataligam-an. Usahay god, maglibog man ta kung alang ba sa Longsuranon o dinhi ba sa Banat. Maayo untag ilang i-indicate da.

Gikan ni sa 09108029534. Matud pa, intact ang atong gobiyerno, apan, samtang silang anaa sa gahom, haruhay ang kabutang, ang katawhan nag-ilaid sa kalisud. Ngano man kono nga mitugot man ta nga sila ang mi-rule karon sa atong nasud. Ang mga tawo nga sinsero mao unta karoy namunoan.

Usa kita ka gawasnong nasud, diin ikaw, ako, ug sila, maoy hawod. Sa ato pa, kon unsa man kita karon, ato kining pagbuot, Dro. Komentaryo? Text 0916-6488650.