Kurakot nga nasud

Usa ka bilyon ka pesos ang gigahin sa administrasyon ni Presidente Gloria Arroyo aron kahatagan og sulosyon ang dugay na nga problema sa kurapsyon sa nasud. Usa kini ka ambisyosong kawsa sa gobiyerno tungod kay kung tan-awon, ang pangurakot diha sa gobiyerno, karon buot hatagan og kasolbaran sa gobyerno ra usab. Ang dakong problema sa pagpangawat sa salapi ug kabtangan sa katawhan, karon buot nang papason sa kagamhanang Arroyo. Apan unsa ba ka seryoso ang maong lakang?

Pakpak alang sa gobiyerno tungod sa maong motibo. Apan sa dili pa ka mosinggit sa kalipay tungod sa maong plano, mas maayo siguro kung imo unang tan-awon unsa ka sinsiro ang gobiyerno sa maong lakang. Ug angayang hinuklugan kung may padulngan ba ang kampanya batok korapsyon kung mismo ang taga gobiyerno ra usab ang buot mo-imbistigar ug mosilot sa mga giingong kurakot.

Matud pa, ang korapsyon ang giingong gigikanan sa problema sa kakabus sa nasud. Tungod sa grabeng pagpangawkaw sa kabtangan sa katawhan, mas nilubog sa kalisud ang ekonomiya sa nasud. Kung sa panahon sa rehimeng Marcos, giingong maihap lang sa mga tudlo ang mga kurakot, karon matud pa, halos tanan nikangkang na ang mga kamot nga may bagang balhibo ug baga nga kubal nga dili mauwaw o magpanagana sa pagpangawat.

Gani, base sa labing uwahing resulta sa survey sa Social Weather Stations (SWS) sa mga negosyante sa nasud, walay kausaban sa mga ahensya sa gobyerno nga giingong kurakot.

Nag-una ang Bureau of Customs nga gisundan sa Bureau of Internal Revenue, Department of Public Works and Highways, Land Transportaion Office, Department of Environment and Natural Resources, Armed Forces of the Philippines, Department of Agriculture ug Commission on Elections.

Sayon ba o lisud ang pagsulbad sa problema sa korapsyon diha sa mga ahensya sa gobyerno? Aduna bay paglaom nga masolbad ang pangurakot nga nahimo nang kabahin sa kinabuhi sa halos tanang Pilipino? Unsa-on pagpapas sa korapsyon nga mao nay gidak-an niining mao nga henerasyon? May solusyon pa ba nga nagpa-abot batok sa pagpangawat sa gobyerno kung ang maong illegal nga binuhatan kabahin na sa serbisyo sa sagad sa mga opisyal sa gobyerno? Kutob nalang ang katawhan sa pagduda ug pagpanagana sa maong kampanya tungod kay ang korapsyon, nahimo nang gawi sa halos tanang Pinoy.

Matud pa, kinahanglan nga magsugod sa pagdisiplina sa kabataan ang solusyon sa kurapsyon. Giingong sa mga panimay palang daan, gitudloan na ang mga bata unsa-on nga mamahimong kurakot. Una, kung ang assignment sa usa ka bata sa iyang tunghaan, gitubag sa ginikanan, unya pag-uli sa bata gikan sa eskwelahan, gipasigarbo sa bata ang iyang perfect score sa iyang assignment, unya ang ginikanan, tungod sa kalipay, iyang gihatagan og premyo ang anak, dako ang posibilidad nga ang maong bata magdako nga kurakot. Nahibawo na ang ginikanan nga dili gikan sa utok sa anak ang tubag sa assignment apan iya gihapong gipasidunggan ang bata.

Ikaduha, ang paghatag og limos sa mga bata nga ana-a sa kadalanan, nga walay laing nahimong trabaho gawas sa pagkang-kang sa ilang mga kamot ug pagpakiluoy sa mga tawo, ang maong bata kung modako, dako ang posibilidad nga mamahimong kawatan o kurakot. Ikatulo, ang bata nga kanunay manghatag og pagkaon sa iyang mga classmates aron higalaon siya, dako ang posibilidad nga kurakot usab ang maong bata kung modako.

Dili sayon ang kampanya batok kurapsyon tungod kay maisip nga dili lang ni kawsa batok sa mga kurakot apan sa usa ka kinaiya nga kabahin na sa kinabuhi sa halos matag Pilipino.