EDITORYAL — Plano batok sa stray dogs

Adunay plano diha sa konseho nga multahan og P1,000 ang tag-iya sa iro nga naglaroy-laroy sa kadalanan sa siyudad sa Sugbo.

Ang maong plano gipangamahan ni Konsehal Christopher Alix kinsa nagtuo nga kun madayon ang iyang plano ug higpit nga ipatuman sa kagamhanan seguradong momenos -- o tingali mawagtang sa hingpit -- ang stray dogs kun mga iro nga libud suroy.

Uyon kami sa maong plano ni Konsehal Alix. Atong na-obserbahan nga nagkadaghan ang stray dogs sa atong kadalanan ug suma pa sa official statistics misaka usab ang gidaghanon sa mga tawo nga napaakan sa iro.

Hinaut nga hatagan sa Konseho og prayodidad kining plano ni Konsehal Alix aron mokunhod ang libud suroy nga iro sa atong mga karsada ug malikay ang katawhan sa hulga sa rabis.