Mga lama ni Pacman

Sa makausa pa, gipakita ni Manny Paquiao ang iyang abilidad sa pamoksing sa dihang iyang gikulata ang Meksikanong si Oscar Larios sa ilang kumbati didto sa Araneta Coliseum sa niaging semana. Klaro kaayo nga walay dag-anan si Larios, apan mipakita usab kinig talagsaong kaisog sa dihang nakasugakod kini sa mga suntok ni Pacquiao.

Naabot og 12 rounds ang maong sangka. Apan wala gayud magsilbi si Larios. Gani makaduha kining na-down sa mga nagpungasi nga suntok ni Pacquiao.

Tuod man, nakita sa resulta nga dakog labaw og puntos si Pacquiao sa tulo ka mga hurado hinungdan nga midaug kini pinaagi sa unanimous decision.

Apan daghan ang nagtuo nga hapit gayud nabiktima si Pacquiao kang Larios, ilabina niadtong ikatulo ka round nga iyang gimakmak pag-ayo si Pacquiao. Kulang kuno sa preparasyon ang Pilipinong kampiyon hinungdan nga dili maayo ang iyang gipakita atol sa maong sangka, lahi sa mga away niya didto sa Estados Unidos.

Kon ang atong kampiyon maoy pangutan-on, wala kuno niya dalia ang maong away tungod kay gusto niya nga malingaw ang iyang mga kababayan. Buot niya nga ipasabot nga dili siyento-porsiyento ang iyang gipakita gumikan kay dili siya gusto nga mabiktima na hinuon sa Meksikano.

Bitaw. Sa akong nakita, kadto nga away maoy usa sa labing maayo sa professional career ni Pacquiao. Imong makita nga kalkulado na niya ang iyang mga lihok sama sa mga lihok nga imo lamang makita sa ubang maayong boksidor sa kalibotan sama ni Ali ug Lewis.

Kini nagpamatuod lamang nga nagka-mature na ang inila'ng Pilipinong boksidor. Dili na sama sa una nga agresibo siyang modasmag sa kontra bisan pagsugod pa lamang sa unang hugna. Ug sa bag-ong niyang estilo, ang mga eksperto sa boksing nagkanayon nga layo pa og maabtan si Pacquiao sa iyang propesyon tungod kay usa na siya sa ilang gitawag og "complete boxer."

Apan bisan pa man niini, akong nasiplatan usab ang lama sa propesyon sa giingong labing popular nga atleta sa nasud karon. Kini pinaagi usab sa mga sipyat sa iyang preparasyon tungod sa ubang gimbuhaton sama sa commercial ug movie shooting, derby ug uban pang mga distraction sa iyang propesyon.

Daghan ang mitagna nga kon dili likayan ni Pacquiao kining mga distractions sa iyang propesyon, hayan kini ra usab ang mobira kaniya ngadto sa lungag sa kaalaotan. Hinuon dili nato gusto nga mao kana ang dangatan sa usa sa labing maayong boksidor sa kalibotan karon tungod kay liboan usab ka mga magdadayeg ang nagtan-aw kaniya isip ilang idolo.

Usa usab sa mga apan ni Pacquiao mao ang iyang kakulangon usahay sa training sa uban niyang mga away. Gani sa iyang ulahing away, usa ka bulan ug kapin lamang ang iyang gigahin alang sa training samtang si Larios subra sa duha ka bulan ang gihimong pagbansaybansay, lakip na ang iyang "acclimatization" didto sa Japan.

Dili kana maoy attitude sa usa ka aspiring ug dedicated nga boksidor. Dili usab kana maoy attitude sa usa ka boksidor nga dako og potensiyal nga mamahimong usa sa labing bantogan sa kalibotan. Wala gayuy kapaingnan ang usa ka boksidor kong kulangan siya permanente og preparasyon sa iyang mga away.

Hinuon, kon abilidad maoy hisgotan, walay pagduda nga usa si Pacquiao sa labing maayo sa pamoksing. Gani kining maong kadungganan gibase usab sa iyang pagpalukapa nila ni Marco Antonio Barrera, Erik Morales, Juan Miguel Marquez ug uban pang inilang boksidor.

Apan kon dili ni Pacquiao makorehian ang ubang sipyat sa iyang propesyon, tulin pa unya sa manatad ang iyang pagkahagba.