EDITORYAL — Ang kondisyon sa mga firetruck

Daghang mga truck sa kabomberohan ang wala marehistro sa Land Transportation Office (LTO). Gikabalaka kini sa mga kadagkoan sa Bureau of Fire Protection.

Apan ang labing angay'ng kabalak-an mao ang kondisyon sa maong mga firetruck. Roadworthy ba kini o dili.

Kadtong aksideteng nahitabo sa M.J. Cuenco Ave. di pa lang dugay diin usa ka firetruck midaro sa walo ka laing mga sakyanan nga miresulta sa pagkaangol sa 20 ka tawo, usa kadto ka "wake up call" alang sa kadagkuan sa BFP.

Pagpahinumdom kadto sa BFP nga tsek-apon ang tanang firetrucks kalabot sa kondisyon sa makina niini ug uban pang parte sa sakyanan.

Hibaw-i nga ang usa ka firetruck gikinahanglan ang kusog nga pagpadagan niini kun dunay sunog ug kun mopalyar ang bisan usa lang ka parte niini, sama pananglitan sa preno ug manobela, dakong kahigayonan nga dunay dakong aksidente nga mahitabo.

Busa kami misugyot nga tsek-apon matag karon ug unya ang kondisyon sa mga firetruck aron malikayan ang disgrasya.