Ito ba’y pagkaing kutsinta at puto?
Aba ito’y aks’yong ang layunin nito
Sana’y mapatalsik ang ating Pangulo!
Matagal nang ito’y ating naririnig
Sa maraming kampo’t sa maraming panig;
Di lamang iisa may ganitong nais
Matanda at bata impeachment ang himig!
Unang nagsatinig ay ang oposisyon
At ito’y sinundan ng ibang katugon;
May dalwang matanda na sulong ng sulong
Pero wala pa ring mangyari sa misyon!
Ngayo’y kabataan ang nagmamatigas
At bagong impeachment ang inihaharap;
Kaya hanggang ngayon ay nakikimatyag
Itong sambayanang kaiba ang hangad!
Kaiba nga sila pagka’t tanging mithi
Ay kapayapaan —- lahat ng sandali
Impeachment at gulo ay ayaw maghari
Pagka’t sa civil war ay baka mauwi!
Sa ngayo’y tahimik itong ating bansa
Dahil ang Pangulo’y di nagpapabaya;
Kung siya’y ma-impeach ngayo’y ano kaya?
Sino ang po-poder? Sila’y ilan kaya?
Iba’t ibang grupo ang gusto’y alisin
Ang ating Pangulo at sila ang sundin;
Dahil sa marami’y h’wag nating alamin
Kung sinong uupo? Ang pinaka-sakim?
Kung kaya ang payo ng pitak na ito
Sa aking latigo ay umiwas kayo;
Ang gawang umiwas magagawa ninyo:
Ang mga impeachment -— pag-isahin ninyo!
Kung kayo’y solido at di watak-watak
Matanda at bata iisa ang hangad;
Marahil saka lang gusto n’yo’y matupad
At magtatagumpay kayong magpalayas!