Apan ang payong gigamit usab sa mga badlongon sa katilingban sa lain nga paagi. Usa ka daotan nga paagi nga tipik ug kabahin sa ilang modus operandi. Ang payong gigamit na sa mga badlongon sa ilang pagpangilad. Unsaon?
Ang estilo mao nga adunay babaye nga moduol ngadto sa prospective victim ug makigsulti niini. Buladahon sa maong babaye ang prospek. Pagkataudtaod, moduol ang kauban niyang babaye ug magpaila nga usa ka negosyante. Unya ipakita sa maong babaye ang daghang kuwarta nga diha ra gisulod sa gitikyop nga payong nga gibitbit niini. Ngiga, no? Kuwarta isulod lang sa payong?
Ang usa sa mga suspek mangutana dayon kon duna bay kuwarta ang prospek. Kon motug-an ang prospek nga duna siyay kuwarta, mopasumangil og huwam ang usa sa mga suspek kay duna kuno siyay paliton. Ang payong nga puno sa kuwarta (Budol money) ibilin sa mga suspek sa prospek nga ilang gihuwaman og kuwarta.
Tugonon pa sa mga suspek ang prospek nga dili gayod mobiya sa dapit kay mobalik sila aron pagkuha sa ilang payong nga may sulod nga kuwarta. Apan maabtan na lang og siyam-siyam, dili na gayod mobalik ang duha ka babaye. Ug ulahi nang madiskubrehan sa prospek nga ang sulod sa gitikyop nga payong nga gibilin kaniya mga ginunting diay nga papel nga gipaibabwan og pipila ka tinuod nga kuwarta. Ilad!
Atong awhagon ang kapolisan sa Pinamungajan sa pagsusi kon unsa ka tinuod kining maong taho. Angay sab maghimog higpit nga pagmonitor niini ang mga opisyal mismo sa barangay Lamac kay sila man ang mas nasuheto sa maong dapit ug itaho nila dayon sa kapolisan kon duna silay katingad-an.
(Sumbong ug reklamo? Text sa 0910-8105522)