Smuggling napud og bugas

Dako nga tulobagon ang atubangon ni Senador Jamby Madrigal sa iyang mga kaubanan sa Senado nunot sa iyang gibuhat nga personal nga pakigkita kang Jose Maria Sison, ang lider sa mga rebelding komunista sa nasud nga tua karon manimuyo sa Netherlands.

Ang Senado dili usab angayang magpaka-buta-bungol lamang sa gibuhat ni Madrigal nga tataw'ng usa ka pagbugalbugal sa atong kaugalingnan.

Dili magamit ni Madrigal ang pasangil nga igo lamang siyang nagtabang aron mahibalik sa lamesa sa panagsabotsabot alang sa kalinaw tali sa atong republika ug sa mga rebelding komunista tungod kay nasayod si Madrigal nga "all-out war" ang palisiya karon sa kagamhanan batok sa mga kaaway niini.

Giisip sa pipila nga usa ka pagtraydor sa mga Pilipino, ilabi na sa iyang mga botante, ang pagpakigkita ug pagpakig-estorya ni Madrigal ngadto kang Sison.

Si Sison, nasayod siya, giisip nga kaaway sa nasud.

* * *

PUTLON. Nahimong sumsoman sa mga estorya-estorya kini si Sison tungod sa kahibulong sa kadaghanan nganong wala pa gyud siya makuha sa kagamhanan hangtod karon.

Sumala pa sa mga tigpaniid sa lakat sa pangagamhanan, kun projekon lang si Sison sa kagamhanan sa Pilipinas, wala na untay rebelyon.

Matud nila ang pagputol sa ulo hingpit nga mopatay sa lawas.

Ang ilang buot ipasabot nga kun mapatay o masikop si Sison (ang ulo), hingpit nang mapatay ang mga armadong front sa mga komunista sa nasud nga mao ang New Peoples Army ug uban pang mga sektor nga ubos sa payong sa Communist Party of the Philippines (CPP) ug National Democratic Front (NDF).

Sama pananglit sa pagpadala og sekretong operatiba aron pagkuha sa ulo ni Sison.

Apan maayong masayod kita nga dili ingon niana kasayon pagputol sa ulo sa rebelyon dinhi sa atong republika.

Maayong mahinumdom kita nga si Sison tua sa Netherlands naka-political asylum.

Busa, ubos siya sa proteksiyon sa Netherlands nga angayan natong respetohan.

Kun gusto kitang magkaaway ug sa Netherlands, mahimo gud nga padad-an og sniper didto sa iyang gipuy-an aron tumbahon ang labing dakong lider sa mga komunista.

Apan, dili kini maoy paagi. Igo na ang pagpiang sa ilang mga fronts pinaagi sa pagdeklarar kanila isip mga terorista nga miresulta sa pagputol sa mga suporta pinansiyal gikan sa gawas.

Matud pa sa chief of staff sa Central Command nga si Col. Rey Ardo, ang pakiggubat karon sa mga rebelding komunista dili 'war of attrition' kun dili maisip lamang nga 'territorial war' diin ang militar usa lamang sa mga components.

Ang iyang gipasabot nga gawas sa pagpuhag sa ilang mga kota, ihatag usab ngadto sa mga apektadong lugar ang ubang component, apil na niini ang paghatag og kalambuan sa ekonomiya, edukasyon, impormasyon ug uban pa aron motunhay ang kahusay ug kalinaw sa nasud.

* * *

SMUGGLING OG BUGAS. Migimaw karon ang ulo sa mga estorya-estorya nga adunay broker nga opisyal sa ilang kapunungan maoy utok niining smuggling og mga imported nga bugas-humay.

Pastilan, ang gingilngigan sa mga tigpaniid diha sa adwana, kining maong broker aktibo pa kaayong motubag sa mga isyu may labot ang customs, ilabi na sa natad sa professionalism kanilang mga lisensiyadong broker. Unya, nag-apil-apil diay sa smuggling sa bugas.

Kun mao na, ka-wala ba diay ulaw anang maong broker.

Sa tanang mahimong i-smuggle, bugas pa gyud ang gi-smuggle.

Nakadawat ko og impormasyon gikan sa usa ka kasaligang tinubdan nga nagreklamo diay sa miaging pipila ka bulan ang National Food Authority tungod kay mikalit og kadaghan ang bugas sa Cebu tungod sa walay pugong-pugong nga smuggling sa bugas dinhi pinaagi nianang maong broker.

Ang gikareklamohan sa NFA, miabot man gud sa punto nga mibarato pag-ayo ang humay nga mas barato pa kay sa bugas nga gibaligya sa NFA.

Nianang puntoha, nakaingon ang mga opisyal sa NFA dinhi sa Cebu nga dihay smuggling.

Pastilan nimu Mr. D.A., tan-awa usab unsay dautang epekto sa ekonomiya kun magpalabi ka og paabot og mga bugas dinhi sa Cebu.

Ambot kaha og nagbayad ba gyud sa sakto nga buhis si Mr. D.A. nianang iyang mga bugas, iyawat makasapalsapal sa koleksiyon sa adwana sa Sugbo.