Ayaw yataki ang legal nga paagi

Gikahadlokan nga mograbe na usab ang politikanhong kaguliyang sa nasud human sa sunodsunod nga pagpasaka sa mga impeachment complaint batok kang Presidente Gloria Macapagal-Arroyo sa niaging semana.

Kaniadtong Lunes, usa ka grupo sa mga oposisyong magbabalaod sa Ubos Balay Balauranan ang mipasaka sa ilang impeachment complaint batok ni Arroyo, usa ka tuig human sa naunang lakang sa oposisyon pagpalagpot sa Presidente ilalum sa impeachment proceeding nga gibasura usab sa mayoriya sa Kongreso.

Gisundan kini niadtong Martes sa laing impeachment complaint nga gipasaka ni kanhi Bise Presidente Teofisto Guingona, kinsa usa karon ka haligi sa kampanya pagsipa sa Presidente gikan sa katungdanan.

Mihirit pa si Guingona pagbahad nga motumaw unya ang civil disobedience batok sa kagamhanan kon yatakan na usab sa mayoriya sa Kongreso ang mga impeachment complaint batok ni Arroyo.

Unya kaniadtong Miyerkules, usa ka obispo sa Romano Katoliko sa dakbayan sa Caloocan ang mi-file usab og impeachment complaint batok ni Arroyo.

Ambot unsa kaha ang iyang nakaon, apan gibarogan ni Bishop Deogracias Iñiguez nga dili panghilabot ang iyang gihimo sa kalihokan sa politika sa nasud kondili iya lamang kuno nga gihimo ang iyang katungdanan isip usa ka concerned citizen aron pagkab-ot sa kamatuoran sa gubot mugna sa mga alegasyon batok sa Presidente.

Ug kaniadtong Huwebes, usa ka grupo sa mga tinun-an ang mipasaka usab og impeachment complaint sa Kongreso batok sa Presidente. Kini maoy ikaupat nga kaso nga gipasaka batok ni Arroyo sulod lamang sa usa ka semana.

Hinuon ang mga complainant malaumon kaayo nga molampos na ning tungora ang mga kaso ug nga padayon nang mapalagpot sa katungdanan si Arroyo.

Klaro kaayo nga dako na usab og implikasyon kining bag-ong mga impeachment complaint. Kini tungod kay mobutho na usab ang ngil-ad nga dagway sa sistema sa politika sa Pilipinas nga mosangpot na usab sa mainit ug hapalad nga kampanya sa oposisyon ug mga militante pagtumba sa kagamhanan.

Hinuon katungod sa bisan kinsang indibidwal o sektor sa katilingban ang pagpangita og kamatuoran sa mga dulom nga isyung nakaapektar sa dagan sa atong nasud. Gani gitugot man kini ilalum sa pahina sa atong demokratikanhong Konstitusyon.

Apan ang lisod lamang sabton mao kining mga lakang pagpalagpot sa Presidente nga usahay sagolan og aksiyon nga wala na magsubay sa isyu. Usa sa mga ehemplo niini mao ang panawagan ni Guingona sa katawhan og civil disobedience batok sa kagamhanan ug ang paglapas sa lagda sa malinawong protesta sa kadalanan nga mosangpot usab sa mga bayolenteng dispersal sa otoridad.

Dili kana maoy paagi pagtuman sa katungdanan alang sa demokratikanhong lakang sa mga responsableng katawhan. Nganong sagolan pa man nato og lama ang legal nga proseso pagpagawas sa atong kasagmuyo batok sa mga kapalpakan sa mga nagkupot sa renda sa pangagamhanan?

Wala magdili ang balaud pagpahigayon og mga protesta batok sa kagamhanan basta magsubay lamang kini sa legal nga paagi.

Sa ako nang gikaingon, katungod sa oposisyon ug mga militante ang paghimog aksiyon batok sa kagamhanan. Apan kinahanglan nga ila usab nga hunahunaon nga dili maagrabiyado ang legal nga proseso alang sa usa ka maayong protesta aron dili kini mosangpot sa mga bayolenteng panghitabo.