Away sa MCIAA?

Sa usa ka lakang nga makapaisa sa kilay, ang mga sakop sa board sa Mactan-Cebu International Airport Authority (MCIAA) nitukod og Arbitration Committee nga mohusay sa kontrobersiya nga namugna sa usa sa labing dakong proyekto sa tugpahanan: Ang multi-milyones pesos nga Apron Expansion nga gitumong aron katugpahan ang Mactan og dugang mas dagkong ayroplano, labi na atol sa nagsingabot nga Apec Summit karong Disyembre ug sa gipaabot nga mas bug-at nga trapiko human sa kalibotanong kalihokan.

Ang sentro sa kontrobersiya mao ang ARN Builders nga giingong maoy nakadaog sa subasta sa proyekto. Ang komitiba nga gipangulohan ni Romualda M. Tamidles ug tulo ka sakop gisuportahan sa lima ka mga inhinyero sa MCIAA nga gipangulohan ni William Joseph A. Sabado. Ang pagsusi sa labing dakong proyekto karon sa MCIAA bisan way taga gawas nga nireklamo o nagsaba-saba balita nang daan. Mas tulogkaron ang mga gimbuhaton nga gisangon sa komitiba.

* * *

Kay tinak-opan man sa publiko ang mga tigom sa MCIAA Board, ug kay tak-om na man kaayo human nabulilyaso sa pagsabak-sabak nila ni MCIAA General Manager Adelberto Yap bisan gipalayas na sa Civil Service Commission (CSC), lisod ang paghipos og igong katin-awan sa ilang mga lakang. Salamat na lang nga may nitugpa sa akong lamesa nga kopya sa memorandum ni Yap niadtong Junyo 20, nga agad sa sugo sa Resolution No. 2006-1072 sa MCIAA Board, nilista sa mosunod nga mga tahas sa komitiba ni Tamidles:

• Pagsubli sa Notice of Termination/Cancellation/Suspension sa kontrata sa ARN Builders sa Apron Expansion. Nganong giputol o gikanselar o gisuspenso man ang kontrata sa ARN? May kalapasan bang nahimo? O may higanteng tiil lang nga nayatakan?;

• Pagtino sa trabaho sa apron nga nahuman na. Sa ato pa, nakasugod nang trabaho sa ARN Builders sa wa pa sila barawa?; ug

• Pagkuwenta pilay tukmang bayad sa agi sa ARN Builders aron kasabutsabotan. Dako gyod tingaling problema apan di sila ganahang mosangpot sa kiha kay andam mang mobayad sa kahago sa ARN?

* * *

Hinaot nga ang mabuot nga mga sakop sa MCIAA Board, kon may nahibilin pa man, motuman sa ilang gimbuhaton pagpasabot sa mga magbubuhis unsay nahitabo ning multi-milyones nga proyekto:

• Tinuod bang ang gahin sa proyekto gipaburot pag-ayong Yap lapas sa gitugotan sa MCIAA Board?;

• Tinuod bang ang ARN Builders gawas nga di maoy paboritong kontraktor may koneksiyon pa gyod sa mortal nga karibal sa usa sa labing gamhanang mga sakop sa MCIAA Board?; ug

• Tinuod bang ang pagpahunong sa trabaho ug pagsubli sa proyekto kabahin na sa pagpul-ong sa MCIAA Board sa mga gahom ni Yap atubangan sa sibaw nga mga pagduda sa mga transaksiyon nga iyang gisudlan?

Email: [email protected]