Palpak sa CIDG-7

Lain na pud nga palpak sa pagpangronda sa kapolisan ang nahitabo didto sa Tayud, Liloan.

Duha gyud sa mga polis sa Criminal Investigation and Detection Group-7 ang naangol human napusilan sa suspetsadong drug pusher nga maoy subject sa ilang operasyon.

Sila si SPO3 Reynaldo Matillano ug PO2 David Enterena sa CIDG-7 nalandig sa Chong Hua Hospital tungod kay napusilan ni Jayvee Miag-ao kang kansang .45 kalibre nga pistola giputos og malong samtang miatubang sa mga polis nga nagsilbeng poseur buyer.

Nganong mosangpot man gyud sa palpak nga operasyon ang kapolisan?

Nagtuo ko nga ang kakulang sa "planning" maoy hinungdan nganong moresulta sa paltos nga pagpangronda ang kapolisan.

Tingale, ang kadanghag sa mga polis atol sa pagpangronda angayan usab pasanginlan nganong aduna gyuy mga palpak ug sayop sa pagpahigayon sa ronda.

Lima sila nga mga polis nga mi-operate didto sa Liloan. Kauban nilang Matillano ug Enterena silang Chief Inspector Fermin Armendares III ug laing duha ka polis.

Busa, dili katuohan nga mapusilan silang Matillano ug Enterena. Siyaro, bisan usa kanila wala gyud makatiktik nga adunay gipalup-itan nga .45 nga pistola si Miag-ao.

Sa ato pa, wala sila magbantay. Wala sila niining 'safety first' ug mideretso lang sila og dasmag ngadto sa balwarte sa suspetsadong pusher.

* * *

KAKULANGAN. Mao kanay dakong kakulangan sa mga polis.

Minus intawon kaayo og alamag sa planning.

Mao man gani nga hipangkulatahan nang uban nga mga polis tungod kay mosungasong nga walay back-up ug kun may back-up utro usab nga danghag, talawan, o ratolon.

Tan-awa ninyo unsay nahitabo niadtong police trainee nga gihimong poseur buyer sa usa ka drug raid sa Calamba, deriyot mapusili sa usa ka pusher.

Maayo gani kay bisiklita lang ang mitugpa sa iyang nawong human gibunalan sa suspetsado. Kun nahitabo pang mibuto kadtong pistola nga gition kaniya sa suspek, tua na unta siya manimuyo sa menteryo ron.

Daghang higayon nga batuon sa mga silingan sa subject sa pagpangronda nga moresulta sa pagkaangol sa mga polis.

Apan sa maong mga hitabo, wala gyud koy nadunggan nga adunay mga tawong namato nga gidakop sa mga polis. Sa ato pa, gipasagdan ra gyud nilang makapamato ngadto kanila ang mga tawo.

Kun kaniadto pa lang adunay namato unya gisampolan nga tawong namato ang gidakop ug gibalhog sa bilanggoan ug gipasakaan og kaso, wala na tingale mamato nga silingan.

Ginagmay lamang kining kapalpakan sa mga polis, apan tataw'ng nakadaot sa ilang departamento tungod sa resulta nga dili angay ikalipay.

* * *

IMPEACHMENT. Bag-ong impeachment complaint batok ni Pres. Gloria Arroyo gisang-at sa miaging adlaw sa usa ka pribadong complainant dungan sa pagpakigtagbo sa presidente ngadtong Pope Benedict XVI.

Lain na usab kining buluhaton nga kinahanglang puy-an sa mga magbabalaod didto sa Ubos Balay Balaoranan.

Lain na usab nga kagubot ang atong mapaabot diha sa hawanan sa Kongreso sa kung unsa man ang sangpotan niining maong impeachment complaint.

Mabiya na usab ang mga dagkong buluhaton nga may labot ang publiko diha sa Kongreso tungod kay mahimo na usab nga busy ang mga magbabalaod pagpadayag sa iya-iyang sentimento kalabot sa maong complaint.

Ang labing dakong implikasyon niining maong impeachment complaint diha sa atong ekonomiya.

Ang pagsang-at niini lain na usab nga pahina sa krisis politikal sa nasud.

Wala pa gani kita makaginhawa sa mga nangaging kagubot, gisugdan na usab karon sa oposisyon ang pagkamas sa laing papel sa paggubot sa kasamtangang administrasyon pinaagi nianang impeachment complaint.

Wala na gani kita makamatikod nga ang gobyerno karon wala na mag-atiman sa interes sa publiko.

Tan-awa ninyo ang presyo sa mga petrolyo, nagsige og saka og 50 sentabos matag semana, apan wala gyuy gihimo ang gobyerno.

Tingale, sa dili matapos kining tuig tag P50 na ang matag litro sa gasolina.

Pun-an pa niining laing kagubot sa kauluhan, manangkong na lang ta niini!