Maglaway ka

Human na-ospital si Presidente Arroyo tungod sa food poisoning, naibanan og dyutay ang akong kaikag sa pag-usab paglibot sa tanang booths ug pagtilaw sa tanang pagkaon nga gipasundayag sa mga dakbayan ug kalungsoran sa Sugbo nga niapil sa kasaulogan sa Cebu Business Month sa Waterfront Cebu City Hotel. Apan naglungut-lungot gihapon ko, bahala na kon ang tibuok nasud nakasaksi unsa kasakit, kapait ug kahasol sa acute gastroenteritis nga giingong maoy nakapaluya sa presidente.

Di mong kabasol nganong nalumay ko sa mga pagkaon nga ako lang gilabay-labayan niadtong Huwebes. Kay gawas nga wa koy paniudto niadtong higayona, nga mahimong nakahimong mas madanihon sa mga pagkaon nga giladlad, nagtuo ko sa kadako sa papel sa pagkaon, uban sa maanindot nga mga talan-awon, makasaysayanong mga suroyanan ug kasayon sa pagbiyahe, pagpahigam sa mga dumuduong.

* * *

Pagtambal sa akong kaibog, o tingali gusto lang kong makaangkon og dugang kadasig sa pagbalik, nagpalaban ko sa mga tigpaminaw sa Arangkada sa DYAB Abante Bisaya pinaagi sa pagpakisayod sa ilang kinaham nga mga pagkaon sa nagkalainlaing mga dapit. Malipayon kong nakugang nga, gawas sa pipila nga wa pa nako matilawi, managsama ang among mga giganahan.

Maong mangahas ko paghatag sa mosunod nga talaan sa akong kinaham nga mga pagkaon:

• Inun-onan. Nakatilaw na kog nagkalainlaing isda nga gi-un-onan, gikan sa labing baratuhong budburon ug bulinaw ngadto sa labing mahalong salmon ug pugapo, apan ang labing lamiang inun-onan alang nako mao lang gihapon ang tulingan;

• Humba. Labing lami nga akong natilawan maong humba nga giagi unag adobo sa among tigpaminaw nga si Matt Canon sa Talamban apan ganahan kong mosuway sa pangandak ni Edgar Gutierrez nga mas lami ang humba nga tin-aw og sabaw sa Sibonga;

• Inasal nga manok Bisaya. Kinalamian ang sa Neo-Neo apan giingnan kong Mayen Tan ug sa ubang nanglibot sa exhibits sa Waterfront nga mahimong pakamatyan ang lami sa bus-ok nga manok Bisaya sa Dumanjug; ug

• Inasal baboy. Hangtod karon naglibog pa ko unsay kinalamian-ang kakuwang bag tambok sa Cang's, ang kabasa sa CNT, ang isog nga timpla sa Rico's (ang paboritong Erap), o ang ka-inato sa Talisay.

* * *

Ang talaan di mahingpit kon di apilan sa mga putahe nga gipatilawan nako ni anhing Jojo dela Victoria sama sa kanding sinabwan sa Bulacao ug nukos nga sinudlan og ginaling baboy sa Pardo; o sa di makalimtang pagkaon sa akong kabatan-on, ang tinowa sa Taboan, ulo sa kanding sa Panganiban ug sinugbang isda sa bato ug linarang sa Pasil.

Sa di pa diay ko malimot, gihatagan kog bakasi sa booth sa Alcantara. Naproblema ko dihang nayabo ang sabaw sa lobby sa Waterfront. Maayo na lang kay nakakita mig putos sa Duty Free. Hastang iro sa five star hotel wa mahibung sa talagsaong baho nga nilabay niya.

* * *

Email: [email protected]