EDITORYAL — Ang maisugong mando sa Pangulo

Mimando si Presidente Gloria Arroyo ngadto sa Armed Forces of the Philippines sa paglusad og kusganon ug halapad nga opensiba batok sa komunistang New People's Army (NPA).

Pigsaton ang maong rebeldeng pundok, suma pa sa Presidente. Aron makab-ot kining tinguha sa atong Pangulo mialokar ang kagamhanan og P76 bilyones nga gamiton sa pagpalit og dugang armas, mga ekipo militar, ug development projects.

Mao kini ang labing maisugon nga deklarasyon ni Presidente Arroyo batok sa insurhensiya nga gipangulohan sa Komunista sud na sa 37 ka tuig.

Kun magmalampuson ang Presidente niining lakang nga iyang gihimo hayan makapaabot na ang nasud og kalinaw dili lang sa kabanikahan kundili usab sa tibuok nasud.

Ug kun makab-ot ang kalinaw, walay duhaduha nga mosunod gayud ang kalambuan ug pag-uswag sa yutang Pilipinhon.