Turismo sa tanan

Salamat sa Suruy-Suroy sa Sugbo ni Gobernador Gwen Garcia, nakaangkon ang mga Sugbuanon og kahigayonan sa pag-ila-ila sa ilang kagikan, paglingi sa ilang kagahapon ug, hinaot pa unta, mas manggialamon nga pag-atubang sa ilang umaabot. Sa wa pang suruy-suroy, daghan nang nangindahay pagsuhid sa tinuod nga Sugbo. Gani, may pipila nang nanglimbasog pagsubay sa mabulukon niyang kasaysayan. Apan ang paglibot ni Gobernador Garcia sa kalungsoran uban sa labing dagkong mga negosyante ug mga politiko maoy nakahawan sa agianan, nakahukas sa mga panagana sa kahilas ug nakapapas sa mga pagduda nga tingalig pag-usik-usik lang sa panahon ang hinugpong nga pagpanamin sa mga Sugbuanon.

Di tang kapaabot nga ugma dayon modagsa sa atong kalungsoran ang minilyon ka mga turista, moawas dayon sa dakong kita ang atong panudlanan ug magakos dayon nato ang dugay nang gidamgo nga tingusbawan. Apan usa ni ka sinugdanan. Nga di nang kapugngan ang hingpit nga pagbugtaw sa katumanan.

* * *

Mora kong gibayaw sa himaya nga nagtan-aw sa pagladlad sa nagkalainlaing kalungsoran sa Sugbo sa ilang labing maanindot nga mga pagkaon, talan-awon, pangalagad ug mga kahigayonan sa patigayon. May mga lungsod nga mas andam ug mas malambuon kay sa uban. Apan silang tanan, salamat sa pabilo nga nadagkotan sa gobernadora, morag nakahilwas gikan sa paglublob sa ngiob nga langob ug nilumpayat ngadto sa naghudyaka nga kahayag.

Hapit tanang mga lungsod nipasundayag sa ilang gituohan nga labing madanihong bahin sa ilang mga dapit. Dunay mga lungsod nga igo lang nipakita sa ilang kinaham nga mga pagkaon ug ubang mga abot ug mga ginama, apan ang kasagaran duna nay mga basahon nga nagpakita sa nakabuylo nang paningkamot pagdani sa mga dumuduong ug nahingpit nang mga tigbayon pagdawat, pag-amuma, pagpapuyo ug pagtagbaw nila.

Ang ilang hiniusang kaamguhan ug paglihok maoy motino sa kalamposan pag-angkon sa makiangayong luna sa Sugbo sa kalibotanong mapa.

* * *

Ang paghawan ni Gobernador Garcia sa agianan nakapasulbong dayon sa kaliboan ug usa ka mga laraw sa pribadong sektor pagdason sa pagkaplag sa turismo nga yawe sa kalamboan. Usa sa labing masaaron mao ang gisugyot sa Turismo Rural Foundation pagtikad sa kalungsoran aron nga mahatag ang labing batakang panginahanglan sa lokal ug langyaw'ng mga turista: Luwas ug haom nga mga pinuy-anan, kan-anan ug pansayan (ang "Casa Rural," usa sa mga aspeto sa programa, modasig sa pagamit sa ancestral homes, nga kasagaran gibiyaan na sa mga sakop sa pamilyang nanglangyaw sa mga dakbayan ug ubang kanasuran).

Ang paglingi sa kagahapon maoy pag-ila sa atong kaugalingon. Ang adunahang kasinatian sa atong katiguwangan makahatag natog gabay sa pag-atubang sa bag-o natong mga gumonhap. Ang ilang kadaogan makahatag natog lunsay nga garbo pag-amping sa atong kinaiyahan, pagbarug sa kaligdong ug pagkab-ot sa makiangayong tingusbawan alang sa labing daghan.

* * *

Email: [email protected]