EDITORYAL — Kinsa ang basolonon?

Ang pagpadayon sa operasyon sa komunistang New People's Army (NPA) diin nagpadayon usab ang kagubot nga gipasiugdahan niini, gipasangil ni Sen. Aquilino Pimentel ngadto ni kanhi Presidente Cory Aquino.

Matud pa ni Pimentel si Cory maoy basulonon niini tungod kay sa dihang nahimo siyang Presidente iyang gipasaylo ug gipamuhian kadtong mga lider sa komunismo lakip na si Jose Ma. Sison, ang founder sa Communist Party of the Philippines.

Mikiat ug migara dayon kining maong mga lider sa komunismo dinhi sa atong nasud ug milig-on ang nipaling-paling na unta nga CPP-NPA.

Si Sison nisibat ug niadtog Europe diin nangayog asylum sa usa ka nasud nga mahigalaon sa mga komunista. Didto niya gipadayon ang iyang pagkupot sa renda sa mga komunista dinhi sa Pilipinas apil na ang NPA.

Tungod ni Sison bisan nangahagsa na ang komunismo sa Europe ug uban pang dapit sa kalibutan diin kaniadto lig-on ang pagkupot sa mga komunistang lider, nagpadayon gihapon ang pagdiskarte sa mga komunista sa Pilipinas.