Maoy iyang gusto nga mamingaw ang Sugbo, aron di makahigayon ang mga terorista pagpamomba ug pagpanghasi sa mga langyaw'ng dumoduong. Maoy iyang gusto nga mag-holiday usab ang mga terorista.
Ug tungod kay mibilib si Gloria kang Tomas, mag-holiday ta dinhi panahon sa Asean meet nga himuon didto sa Mandaue ug Lapu-Lapu. Ambut unsa unyay mga activity nga himuon dinhi sa Cebu City. Lagmit sayaw-sayaw ug kaon-kaon lang, kay ang mga major sessions adto man sa Cebu International Convention Center sa Mandaue ug lagmit sa Shang-rila sa Lapu-Lapu.
And for security reasons, di siya gusto nga si Pres. Bush mosalmot sa meet, tungod kay maka-invite lamang siya sa mga terorista pag-anhi sa Cebu. Sa ato pa, maoy pagtuo ni Tomas nga si Bush di magda'a ug kaugalingong security, ug kang Tomas security lay saligan.
Bisag nahadiin na lang na si Bush, sa nagkalainlaing dapit sa kalibutan, wa'a gyuy nibalibad sa iyang presence for reason of security. Unsa man say hadlokan ni Tomas nga duna na man unyay mga armalite ang iyang mga barangay captain?
Yuna pa, mao ni ang solusyon ni Tomas batok sa paghitak sa kriminalidad sa atong siyudad? Buot ba niyang ipasabot nga kon armado na ang usa ka tawo, di na siya mapusilan?
Sama sa ilang solusyon batok sa pagpamatay sa mga sakop sa media, ila lang konong hatagan og mga armas ang mga mediamen. Sa ato pa, kon magtakintakin nakog 45, di na ko mapusilan?
Na, hala, di na lang nato paanhion si Bush kay tingali unyag unsay mahitabo si Tomas na hinooy pasanginlan. Ug puslan man, aron gyud pag-seguro nga wa'ay mahitabo, di na lang nato ipalahos dinhi ang Asean Meet.
Hapit na baya, unom na lang ka buwan ang pagpangandam. Kon buot hunahunaon, karong mga panahona, natataw na kon unsa man ang mahitabo niining upat ka adlaw nga Meet. Di ba, Dro?
Komentaryo? Text 0916-6484650