Dasmagan ang biktimahon

Kining maong estilo sa modus operandi sagad anha mahitabo sa mga aseras. Kasagaran, duha ka tawo ang maghimo niini. Ang usa maoy modasmag sa prospective victim samtang ang kauban niini maoy mopahigayon sa pagpanguot.

Ang estilo mao nga samtang maglakaw ka sa aseras, adunay duha ka tawo nga hilom nga nagsunod kanimo. Unya kon makakita nag tukmang tayming, ang usa kanila mo-overtake kanimo sa paglakaw. Tuyoon gayod niini ang pagdasmag kanimo dayon niining paturatoy og lakaw.

Ang komon nga reaksiyon mao nga sundan gyod nimo pagtan-aw ang tawo nga midasmag kanimo. Tingali mobati kag kalagot. O ba kaha mahibulong ka nga tungod sa iyang pagdinali nadasmagan ka niya diha sa agianan.

Wala ka lamang ing kasayoran nga samtang ang imong atensiyon nakabig niadtong tawo nga midasmag kanimo, ang iyang kauban mihinok nag panguot sa imong bolsa o bag nga dala aron pagkuha sa mahinungdanon nimong butang sama sa wallet ug cellphone. Bantayi ninyo kining maong estilo sa modus operandi diin dasmagan sa usa sa mga suspek ang makursonadahan nilang biktimahon.

Sa laing bahin, mipadangat sa iyang reklamo ang tag-iya sa cellphone number 0910-4520172 mahitungod sa usa ka car wash dinhi sa dakbayan sa Sugbo. Gihatag niya ang kompletong ngalan sa maong car wash apan ato lang unang gipugngan. Basta kay ang sinugdanan sa ngalan sa maong car wash mao ang GD.

Mireklamo ang atong texter mahitungod niining maong car wash tungod kay, matud pa sa iyang alegasyon, kada pahinlo gyod niya sa iyang awto aduna gyoy mawala. Usahay mga sensilyo ang mawala. May mga higayon nga mga butang sulod sa awto ang mawagtang inigpalimpiyo niya sa iyang sakyanan.

"Seguro dili nila iuli inighuman og vacuum," nagkanayon ang atong texter.

Kon tinuod kini, labing seguro nga binuhatan kini sa mga trabahante sa car wash. Angay silang disiplinahon sa tag-iya ug tagdumala sa car wash aron sila magmatngon ug wala nay kustomer nga moreklamo.

(Sumbong ug reklamo? Text sa 0910-8105522)