Newspaper gigamit sa Modus

Kun magsakay ka og PUJ, ayaw gayod pagkompiyansa kay posibleng mabiktima ka sa mangunguot. Niay modus operandi sa panguot karon nga ang newspaper gigamit sa mga suspek aron paglipat sa ilang prospective victim.

Kasagaran duha ngadto sa tulo ka tawo nga maghimo niini. Ang estilo mao nga dili sila magtupad sa paglingkod aron dili mailhan nga kauban. Samtang magdagan ang sakyanan, ang usa o duha kanila mobukhad sa dalang newspaper ug magpasumangil sa pagbasa-basa.

Ang newspaper nga gamiton sa mga suspek mao gayod kanang broadsheet. Bukharon gayod nilag maayo ang pamantalaan aron lakip ang ilang katupad nga prospect madisturbo sa ilang gibuhat. Ang ilang kauban maoy mohinok og panguot sa bolsa o ba kaha sa bag sa ilang biktimahon. Pagbantay kamo niini.

* * *

Sa laing bahin: "Kining Laray San Roque, ba. Grabe na man ang shabu, uy. Mora man silag nagtinda og isda. Yano ra kaayo. Diha sa kapilya dapit, naay babaye diha nga nagtinda og juice, sa eskina gyod. Mao nay nagtinda og shabu." -- 0910-8585700

Gipatik ko kining maong text dili tungod kay kombinsido ko nga tinuod kining maong sumbong. Gibutyag ko lang kini aron masuta kon unsa gayod ka tinuod nga ingon na niini kayano ang pagpamaligya og shabu diha sa Laray San Roque.

Sa akong pag-analisar sa text sa atong texter, ingon sa dayag kaayo ang pagpamaligyag shabu diha sa maong dapit. Wala na kini isekreto. Pareho ra god sa pagbaligya og isda. Sa ato pa, daghang mga tawo ang makakita ug makasaksi sa pinalitay og shabu diha sa Laray San Roque.

Mao nga angayan gayod kining susihon. Kanang babaye nga mamaligyaay og juice nga gitumbok sa atong texter nga usa sa nagbaligya og shabu, maayo tingaling masusi kon tinuod ba kini. Wala nato kondenaha ang maong babaye. Pero maayong masuta kon tinuod ba kining pasangil sa atong texter batok kaniya.

(Sumbong ug reklamo? Text sa 0910-8105522)