Kapolisan sipyat sa ilang misyon

Sa akong pagsulat niini, moabot na sa 166 ka tawo ang biktima sa giingong mga vigilante dinhi sa dakbayan. Tungod niini, daghan hinuon ang nakapangutana kon masulbad pa ba kaha sa otoridad kining maong problema.

Ang maong pagpamatay sa gidudahang mga vigilante nagsugod kaniadtong Disyembre sa 2004 ug hangtud karon wala ni usa ka kaso ang nasulbad sa otoridad. Kini usab ang hinungdan sa pagtumaw sa mga pagduda sa katawhan nga may kasayuran ang kapolisan niining walay puas nga pagpatay sa giingong bugok sa katilingban.

Apan may basihan usab kining maong mga pagduda. Kini gumikan kay ang mga vigilante killing nagsugod human mideklara si Mayor Tomas Osmeña nga mohimo og usa ka team sa kapolisan nga maoy molakag sa mga badlongon sa dakbayan, ilabina niadtong mga nalambigit sa pagpayuhot sa ilegal nga druga.

Pipila ka adlaw human sa deklarasyon ni Osmeña, nahulma dayon ang "Hunters Team," usa ka unit sa Cebu City Police Office nga naglangkob sa mga labing tang-an nga sakop sa kapolisan sa dakbayan. Apan wala magdugay, ang ngalan sa maong grupo gihulipan ngadto sa "Crime Suppression Unit" siguro aron mas maayo ang approach niini ngadto sa katilingban.

Hinuon grabe nga nakapanghimakak ang kapolisan nga aduna silay koneksiyon sa mga vigilante killing sa dakbayan nga gikondenar na sa nagkalain-laing sektor, lakip na sa Commission on Human Rights, Integrated Bar of the Philippines ug sa impluwensiyadong simbahan.

Apan bisan pa man niini, pabilin ang pagduda sa katawhan sa tanghaga nga naglikos sa pagkatawo sa mga vigilante. Apan daghan ang nagtuo nga aduna gayuy kahibalo ang otoridad sa mga pagpatay sa giingong mga kriminal sa dakbayan tungod lagi kay walay bisan usa ka kaso nga ilang nasulbad.

Kini nagpasabot lamang nga hangtud karon, pabiling blangko ang kapolisan sa ilang imbestigasyon sa serye sa mga pagpatay sa dakbayan nga kadaghanan sa mga biktima mga kanhi binilanggo.

Gani, giangkon sa bag-ong pangulo sa regional police office nga si Silverio Alarcio Jr. nga sa pagkakaron, wala pa silay nakit-ang kalamboan bisan sa usa ka kaso sa mga vigilante killing sa dakbayan.

Nagpasabot ba kini nga nagduhaduha ang otoridad sa ilang mga pakisusi tungod kay basin unya kon aduna silay maligsan nga mga impluwensiyadong tawo nga nagpaluyo niining mga pagpatay?

Tinuod nga nahadlok ang mga saksi ug pamilya sa mga biktima pagkooperar sa imbestigasyon tungod kay basin unya kon dunay dautan nga mahitabo kanila. Apan katungod sa otoridad ang pagpursige sa ilang imbestigasyon niining mga vigilante killing aron mahatagan usab og hustisya ang mga biktima bisan pa man sa ilang dautang binuhatan.

Dili ikalimod sa atong mga opisyal nga ang mga vigilante killing naghatag hinuon og dakong lama sa kahusay ug kalinaw sa dakbayan. Ug walay laing nag-antos niining dautang imahe sa dakbayan kondili kita mismong mga lumulupyo.

Hangtud kanus-a mahuman kining mga extra-judicial execution sa dakbayan, walay usa nga nasayod. Apan angay lamang nato hinuktokan nga kining serye sa mga pagpatay sa giingong mga kriminal dili sulbad sa grabe nga problema sa kahusay ug kalinaw sa dakbayan.

Hinuon, naghatag kini og impresyon nga inutil ang kapolisan sa pagpatuman sa nag-unang misyon sa ilang katungdanan nga mao ang pagmintenar sa usa ka hapsay ug malinawon nga komunidad.