Hala, misa misa sa ta?

Ang Dios Miingon
Hunyo 18, 2006: Solemnidad sa mahal nga lawas ug dugo sa atong Ginoong Jesu-Kristo (Corpus Christi)
Mga Pagbasa: Ex. 24:3-8/Heb. 9:11-15Mk. 14:12-16, 22-26

Hunyo 16, 2006 sa may alas nuybe hangtud sa alas tres sa hapon atua kaming siyam uban nilang Mons. Cris ug Fr. Mhar sa Center for Ministry and Liturgy kay lagi magpraktis na og Misa!" Kay abi man gud ninyo mga higala nga sa Martes pohon (Hunyo 20), kining inyong ubos nga alagad, sa Ministeryal nga Pagkapari gasahan pinaagi sa Sakramento sa Ordenasyon. Salamat sa inyong pagbulig! Salamat sa inyong mga pag-ampo kay at long last, niabot na gyud ang takna ug panahon, nga maoy sinugdanan sa laing hugna sa pagkinabuhi sa pagpangalagad ingon nga pari.

Ang pagkaparing ministerial dili gayud halayo sa Sakramento sa Sagrada Eukaristiya. Sanglit, kabahin naman kini sa maong bokasyon sukad pa sa dihang nitambong sa talad kan-anan ang atong Ginoo uban sa iyang mga tinun-an. Ug hangtud karon padayon nato kining gihandom ug gihatagan og dakong pagtagad ingon nga bililhong bahin sa atong Sakramental nga pagkinabuhi.

Sa matag higayon nga mosaulog kita ning dakong pangilin sa Corpus Christi mas maayo tingali nga atong patidluman ang mga mosunod nga mga punto:

• Nga ang Misa dunay kalambigitan sa inadlaw'ng pagkinabuhi. Adunay continuity nga mahitabo human sa Dismissal Rite sa Misa. Nga sa laktod pa: "Atong puy-an ug imantala ang atong nakat-onan ug napupo panahon sa Misa. Nga dunay kausabang mahitabo inig-gawas na nato sa simbahan.

• Nga ang Eukaristiya adunay sosyolohikal, moral ug politikal nga implikasyon nga mausa ning mosunod: pakiglambigit, hustisya, ug pangalagad sa way kaping kabubut-on.

Kini tungod kay ang kinabuhi nato gidasig nga magmabungahon. Sa unsa mang paagi? Diha sa paghalad niini ingon nga sakripisyo aron makabaton og kinabuhi ang uban. Nahadlok baya ko sa maong responsibilidad apan diha sa makanunayong pagkalawat sa bililhong Lawas ug Dugo ni Cristo, sayud ako nga anaa ang kalig-on ug kaseguroan. Mahimo unta ang atong kinabuhi ingon nga tinuoray nga diwa sa Misa dili lang kay sa misa misa!