Kini gani maoy rason nga ang mga gwardya sa lainlaing dagkong tindahan mipatuman na og higpit nga pagbantay nga walay makasulod nga explosibo sa gibantayan nila nga balay-patigayon.
Apan ang pangutana kon may igo ba nga kinaadman ang mga gwardya pag-ila sa mga illegal nga butang aron dili sila malutsan. Akong ikasulti nga kuwang kaayo sa abilidad ang mga gwardya.
Duha mi nga nagkuyog pagsulod sa dakung department mall dinhi sa dakbayan. Ang akong kauban may gidala nga armas apan bisan og girekisa siya sa gwardya, wala siya mabantayi nga nagdala og 45 kalibre nga pistola.
Aw hinoon, ang armas dili man g'yod makahimo og grabeng kadaut sama sa bomba. Nagduda g'yod ko nga dili makaila ang mga gwardya kon bomba na ang ipasulod sa gibantayan nila nga department store.
Bisan og suwayan nato. Apan dili nako ibutyag ang mga paagi kay makakuha unya og pagtulon-an kadtong mga nagplano sa paghimo og kagubot diha sa publikong lugar.
Awhagon nako ang mga chief security diha sa mga mall. Usik ra g'yod sa panahon ug kahago kanang gihimo sa inyong mga gwardya nga magsamin-samin ilawom sa sakyanan.
Kon ako'y terorista, nganong anha man nako ibutang ang eksplosibo sa ilawom sa kotse? Anha nako ibutang sa sulod sa sakyanan, o kaha sa baggage compartment.
Kini maoy timan-i. Kadtong gusto nga magdala og mga butang nga gidili, mangita g'yod og paagi nga dili kamo makabantay. Ako mismo nakamatuod g'yod nga naghalhal lang ang ubang gwardya.
Ang gwardya sa Ayala Business Center maoy usa sa labing estrikto nga mohiling sa mga butang sa mga mosulod, apan dihang akong gisuwayan, "nagmata lang og buntag."
Apan dili ko dautang tawo. Wala ko'y bomba nga gidala. Dili usab nako ikatug-an og unsay akong gidala nga wala nila makit-i. Apan sigurado ko nga kon ako'y magdala og explosibo, dili sila makabantay.
Ang akong tambag sa mga gwardya, pagpaigmat g'yod ug paandara pag-ayo ang inyong utok.
Una nga makabantay niini ang mga motorista. Tan-awa ang kabahin sa Imus Avenue, Osmeña Boulevard, dili ba nindot na kaayo kay giaspalto ang kanhi mga lubak-lubak nga karsada.
Kana layo pa gani ang Disyembre. Nasayod ko nga wala nay hunong ang pagpaanindot sa atong karsada aron nga maangkon nato ang pagdayeg sa mga langyaw nga manganhi unya sa Sugbo.
Gawas ana, molambo usab ang negosyo dinhi kay ang kadagkoan sa kagamhanan, ilabi na ang mga taga laing nasud, anha man g'yod sa mga hotel samtang ang ilang kauban sa delegasyon magsuroy-suroy man g'yod sa lainlaing dapit.
Maayo lang lagi unta og walay maghimo og binuang. Mao kini ang rason nga suportahan nato si Mayor Tomas Osmeña nga lig-onon pag-ayo ang atong pagpatuman og mga security measures.