Iresponsable

Nikurog sa kahadlok ug kabalaka ang publiko sa dihang gibulgar ni Mandaue City Mayor Thadeo Ouano ang giingong intelligence report sa pagpangabot sa 80 ka mga terorista dinhi sa Sugbo aron sa paghimo og kasamok atol sa gitakdang ASEANsummit karong Disyembre.

Si Ouano miangkong target siya sa mga terorista uban sa laing mga supporters ni Presidente Gloria Macapagal Arroyo dinhi sa Sugbo. Ang pamahayag ni Ouano klarong nakapakugang sa iyang mga kaubang lokal nga opisyal sa Sugbo.

Wa kapugong si Mayor Tomas Osmeña sa dakbayan sa Sugbo ug dali nga mipakalma sa nakugang nga publiko ug sa mga negosyante pinaagi sa pag-ingon nga dili terorista kon di turista ang 80 nga nangabot dinhi sa Sugbo.

Ang mga opisyal sa kapolisan lakip sa nakalitan ug nangangha sa kasayuran nga gitug-an ni Ouano. Ang bag-ong milingkod nga hepe sa kapolisan sa rehiyon, C/Supt. Silverio Alarcio miingon nga ilang susihon ang report ni Ouano.

Paglabay sa usa ka adlaw miingon dayon ang kapolisan nga way igong basihanan ang maong report tungod kay imposible nga ang mga terorista nga dunay tinguha pagmugna og kasamok sa usa ka dapit magpanon. Matud sa kapolisan nga kasagaran sa mga terorista dili kini mo-operate nga daghan tungod kay mas sayon silang masakpan sa awtoridad.

Ang pamahayag ni Osmeña ug sa kapolisan klarong paagi nila pagbadlong ni Ouano nga mohilom ug di magpataka og buka sa iyang baba tungod kay makamugna kini og kahadlok ug posibling makapaislag sa mga turista ug sa mga negosyanteng nagtinguha pagbubo og puhonan.

Apan inay nga tak-umon ang iyang baba ug mangayo'g pasaylo sa kahadlok nga namugna sa iresponsable niyang pamahayag miinsister hinuon kini. Inay pasalamatan si Osmeña sa pagsawo aron tabunan ang dako niyang bulilyaso nasuko pa hinuon kini ug miingon nga nainsulto siya sa pamahayag sa mayor sa dakbayan sa Sugbo.

Pastilan, nimo Mayor Ouano, pananglitan tinuod ang pagpangabot sa mga terorista dinhi sa Sugbo wa kinahanglana nga imong hadlokon ang publiko pinaagi sa pag-anunsiyo niini. Ang angayan unta nimong gihimo mao ang sekreto nga pagtug-an niini ngadto sa kapolisan aron maimbistigahan.

Gawas pa wa intawo'y klaro ang imong tinubdan sa report. Tiaw mo nga gisulti-an ra sab ka sa imong umagad nga maoy dunay higala sa intelligence community nga mao usa'y mitawag niya nga pabantayon ka kay target ka sa 80 ka mga terorista nga nangabot dinhi.

Matud pa sa report nga pito sa 80 nadakpan na. Hain man ni ang nadakpan karon? Ambot unsay nahitabo ni Mayor Ouano nga di man unta iresponsableng pagka opisyal ang akong pagkaila kaniya. Pero sa iyang gihimo nagpakita kini sa iyang pagka-iresponsable.

[email protected]