Si Lorry De La Serna, ang pangabaga ni Reuben Canoy sa kontrobersiyal nga Mindanao Independence Movement, nibanhaw sa 4th of July Independence Movement nga gilusad sa mga sakop sa media ug mga beterano sa ikaduhang gubat sa kalibotan sa Cagayan de Oro niadtong 1992. Atol sa Kulokabildo.Com sa DYAB Abante Bisaya nga gipahigayon sa Ayala Activity Center, gipasabot ni De La Serna nga angayng hunungon nang higanteng eskandalo sa pagsaulog sa sumad sa kaugalingnan sa Pilipinas sa sayop nga adlaw.
Gikuwestiyon ni De La Serna ang pagdeklarar ni Emilio Aguinaldo sa kagawasan sa Pilipinas niadtong Hunyo 12, 1896 kay di pa gawasnon ang Pilipinas niadtong higayona. Wa makalingkawas ang Pilipinas gikan sa pagulipon sa mga langyaw kay nagpabilin ang mga Katsila nga nagkontrolar sa Pilipinas hangtod nga ila tang gibaligya ngadto sa Estados Unidos pinaagi sa Treaty of Paris sa 1898. Matod ni De La Serna ang kagawasan sa Pilipinas gihatag sa US niadtong Hulyo 4, 1946.
Apan si kanhi gobernador Pablo Garcia, laing dinapit sa Kulokabildo.Com, kusganong nisukwahi. Matod niya angayng ilhon ang deklarasyon ni Aguinaldo nga maoy sinugdanan sa paglingkawas sa Pilipinas gikan sa Espanya. Iya ning gipakisama sa pagdeklarar sa kaugalingnan sa Estados Unidos gikan sa Britanya niadtong Hulyo 4, 1776, bisan mao pay pagsugod sa ilang rebolusyon, gani ang ilang batakang balaod naumol tulo ka tuig human sa deklarasyon sa kagawasan.
Matod ni Garcia ang Hulyo 4, 1946 mao ang politikanhong pagkahaw-as sa Pilipinas gikan sa pagka colony sa Estados Unidos. Wa siyay nakitang panginahanglan, ni kaayuhan alang sa nasud ug sa katawhan, sa pagbalik sa adlaw sa kaugalingnan ngadto sa Hulyo 4. Matod niya ang pagbalhin sa kasaulogan sugod niadtong 1963 mao nay namat-an og buot sa mga batan-on busa angayng paundayonan na lang.
Nagkauyon hinuon silang Garcia ug De La Serna nga di hingpit ang kagawasan nga naangkon karon sa Pilipinas. Gibasol ni De La Serna ang katibuwaag sa katawhan ngadto sa giingon niyang mga bakak sa kasaysayan nga gawas nga wa matul-id gihimo pa gyong sukaranan sa way kinutobang mga binuang sa mga nagpulipuli pagtungkawo sa gahom pagduma sa nasud.
Sa iyang bahin, si Garcia niingon nga bisan ang US di hingpit nga gawasnon. Kay wa nay nasud karon nga makabarug sa iyang mga tiil. Kinahanglan nang mobukas sa ilang merkado sa ubang kanasuran.
Giawhag sang Garcia ang mga tawong padayong nagtuo nga dunay espesyal nga luna ang Pilipinas sa kasingkasing sa US. Matod niya ang US mopalabi sa iyang interes, bisan batok pa sa Pilipinas.
Nipasabot siya nga gipalingkawas sa US ang Pilipinas dili tungod sa gugma kon dili tungod sa kadaot sa Amerikanhong ekonomiya sa padayong pakigtigi sa Pilipinas, isip colony, sa ilang mga produkto ug patigayon.