Tamang ehersisyo at diet

MAY mga kaibigan ako na lampas 60 years old na pero maganda at malusog pa rin ang katawan. Ang kanilang sekreto: Regular na pag-eehersisyo at tamang diet.

Si Perla, 66, ay nagsabi na hindi niya kinakalimutang mag-exercise araw-araw. Mahilig daw siyang mag-ballroom dancing. Madalas siyang mag- lakad. Ilang blocks ang kanyang nilalakad patungo sa tirahan niya sa Mandaluyong City. Mahalaga raw ang paglalakad para masunog ang fats at calories sa katawan.

Si Caridad, isang kaibigan na nakatira sa White Plains ay nagbi-brisk walking tuwing umaga. Mabilis daw ma-burn ang calories at toxins sa katawan sa brisk walking.

Si Lolit, isa pang kaibigan ko sa Ayala-Alabang ay may sinusunod na diet para mapanatili ang kanyang figure.

Paggising niya sa umaga, hindi siya nagka-kape. Pineapple juice o camote juice ang kanyang iniinom. Ang camote juice ay galing sa nilagang kamote na nilagyan ng honey. Sa tanghali, dalawang hinog na saging na saba (hindi nilagang saba) ang kinakain niya. Sa gabi naman ay kumakain siya ng kanin, isda, gulay at prutas.

Laging tandaan, mahalaga ang exercise at ang tamang diet sa katawan.