VK sa Guizo

Ang barangay Guizo usa sa 27 ka barangay sa Mandaue City nga gikataho nga may nag-operate nga video karera. Kining maong taho gikompirmar sa usa ka concerned citizen nga tigbasahan niining ubos kong lindog. Nakapangutana gani siya nako kon unsay angay nilang buhaton aron masumpo kining maong operasyon.

Matud pa sa atong texter: "Ang video karera diri sa Guizo dili man madakpan bisan naay konsehal diri nagpuyo. Nagpakabuta-bungol man, walay action. Lakip ang mga bata magdula." -- 0926-4000342

Wala iklaro sa atong texter kon unsang konsehala ang iyang buot ipasabot, konsehal ba sa siyudad o konsehal mismo sa barangay Guizo. Basin diay kon wala makaabot sa kasayoran ni Mr. Konsehal nga may operasyon sa video karera diha sa Guizo. O kon nasayod man siya niini, nagpa- "patay malisya" lang, sa mga Tagalog pa. Mao kiniy nakadaot!

Hinaot unta nga mahimoan og lakang aron mahunong na ang video karera operations diha sa Guizo. Mora man og dayag na kaayo ang maong operasyon pero nganong dili man madakpan. Lig-on ba og gisandigan ang operator niini? Nangutana lang ko, mga suki.

* * *

Sa laing bahin: "Sir, naay mga dispatser diri sa Lapu-Lapu, dapit sa may merkado Casia. Magdungan na man sila og pangayo. Masuko ra ba kon balibaran. Unya inigkahapon hubog-hubog na. Mangayo na sad og para sagol. Naa pay mga enforcer nga adto ta pahunonga sa layo. Masuko na lang ang pasahero nga manaog. Di man mi makapakanaog sa jeepney stop kay ilang sitahon. Unya duna silay gipatama nga jeep. Salamat sa pagtagad." -- 0920-6098738

Pagka walay batasan sab nianang maong mga dispatser. Magdungan silag pangayo? Buot ipasabot nga bisan usa ray nang-dispats sa usa ka jeep, silang tanan mangayo sa driver? Dakong binuang. Bahin sa mga enforcer nga mosita kon mohunong mo sa jeepney stop, angay nila kining ipasabot kon ngano. Wala nuon ko makasabot kon unsay buot mong ipasabot sa "Gipatama" nga jeep.

* * *

(Sumbong ug reklamo? Text sa 0910-8105522)