Ang tukmang pulong nga ikahulagway sa atong kahimtang sa pagka karon mao ang "grabe."
Sayonan ka, ang matag litro sa gasoline miabot na og kapin sa P42, samtang kapin usab sa P37 ang krudo. Sa laktud, pait kaayo alang sa mga tag-iya og sakyanan.
Ang mga taxi driver, mga nagmaneho og PUJ, maibanan ang ilang kitaon matag adlaw tungod kay mahal na man ang gasoline.
Mahal na kaayo ang kilo sa bugas sa pagka karon. Mao nga bisan anha ka sa mga karendereya, bati kaayo ang matang sa bugas nga ilang gigamit. Klaro kaayo nga gikan sa National Food Authority.
Unsaon, kon mopalit sila og mga Ganador, Fancy Rice ug uban pang maayong matang sa bugas-humay, dili nila kini ikabaligya og tag P5 ang takus.
Kon mahalon usab ang baligya, walay mangaon sa mga karendereya nga mopamahal sa ilang baligyang pagkaon.
Dia bitaw'y baligyaanan og Ngohiong, longanisa ingon man puso atbang sa FREEMAN, kusogan kaayo. Maglinya god ang customers bisan wala pa magsugod ang klase.
Abi ninyo og ngano? Makakaon ka man og P12. Duha ka puso ug duha ka Ngohiong. Sa laktud, pait na lagi ron kaayo. Dunay gisugyot nga hatagan og across the board nga increase sa sweldo ang tanang kawani.
Aw, kon maaprobahan kini maayo na kaayo. Apan hayan daghan gihapong kompaniya ang dili makapatuman paghatag og dugang usbaw nga sweldo sa ilang mga kawani.
Tiaw mo, tag P150 ang umento sa sweldo matag adlaw ang gipangayo. Nagpasabot nga P4,500 ang buwan nga increase. Kami hinoon sa Freeman-Philippine Star, kon unsay gimbut-an sa balaod, motuman man g'yod ang among kompaniya.
Ang pait mao kadtong mga kawani nga nagtrabaho sa ubang kompaniya nga gahi kaayo mohatag og usbaw. Kon imo sab nga pugson paghatag og umento, posible nga manirado na lang kay maalkanse.
Pero bisan gani og buotan kaayo nga mohatag og sweldo ang among kompaniya, nakabantay tingali ang uban nakong mga higala, pirmi na lang ko nga mag-motor aron makadaginot sa gasto.
Produkto kini sa Brigada Eskwela, usa ka proyekto sa kagamhanan diin ang mga ginikanan moabag aron matubag ang panginahanglan sa kabataan.
Aw, kami sa First year-venus section, nag-amot-amot og tag P500 matag usa alang sa steel cabinet ug sa ubang gasto sa pagpanindot sa classroom.
Kamo diha sa ubang public schools, sunda ninyo ang gihimo sa mga ginikanan sa science high school. Sa Among classroom, upat ka ceiling fans bisan og open ang masig ka kilid sa lawak, unya walay lamok nga makasulod kay gibutangan man namo og pino nga screen.
Kon nahimo namo ang pagpaanindot sa gubaon na nga lawak, walay rason nga dili usab mahimo diha sa uban.