Mga hold-aper sa So. Expressway

Misiaw pag-ayo ang mga hold-aper karong panahona. Dayag nga dili kita luwas sa atong pagpanakay og PUJ tungod kay kon dili kita mabiktima sa mga mangunguot, posible man nga mabiktima kita sa nakasakay nga hold-aper.

Dunay nakataho nako nga diha sa highway sa N. Bacalso Avenue, anaay mga hold-aper diha nga mag-atang sa moagi nga mga PUJ. Kasagaran anha sila mag-atang sa dapit sa CIT. Ang uban kanila anha mag-atang sa eskina sa N. Bacalso ug Fatima.

Ang estilo niining maong mga hold-aper mao nga mag-atang sila sa mga PUJ nga moagi. Dili sila mopara sa PUJ. Pero kon ilang mamatikdan nga ang PUJ mopahinay inig-abot niini sa ilang tungod, mokapyot sila sa sakyanan. Unya pagkataudtaod, mopagawas na sa ilang hinagiban dayong tion ngadto sa pasahero.

Ang kasagaran nga biktimahon niining maong mga hold-aper mao ang mga pasahero sa PUJ nga walay konduktor. Kon mosukol ang pasahero nga ilang biktimahon, ila kining dunggabon. Sa ato pa, kursonada gayod nga mopatay kining maong mga hold-aper. Pastilan!

Kasaligan nga tinubdan ang naghatag kanako niining maong impormasyon tungod kay siya asawa sa usa ka driver og PUJ. Siya mismo maoy mokuyog sa iyang bana sa pagpamasahero ug maoy mangolekta sa plite sa mga pasahero. Makadaghan na siya makasaksi nga may pasahero nga gihold-ap nianang mga bugoy nga mangatang diha sa highway, duol sa CIT ug sa eskima Fatima.

Maayo tingali nga butangan og polis kanang dapita diha aron nga mokalma kanang maong mga badlongon. Dili maayong pasagdan kana sila kay makahatag kana silag kahasol sa mga pasahero. Maghatag pa gyod og peligro sa kinabuhi sa pasahero tungod kay kursonada man gyod nga mopatay ang maong mga hold-aper.

Matud pa usab sa naghatag kanako niining maong impormasyon, dihay kausa nga misumbong sila sa mga polis kay gihold-ap ang usa nila ka pasahero. Mikatawa man lang kuno ang polis nga ilang gidangpan! Unsa man kini ka tinuod, Sir? Pastilan, kon ingon niini ang taras sa atong kapolisan, kinsa man lang diay ang atong kadangpan nga makatabang gyod nato? Makapahisagmuyo kini sa mga lungsoranon!

(Sumbong ug reklamo? Text sa 0910-8105522)