Ang BBRC

Ang BBRC mao ang Bagong Buhay Rehabilitation Center, dapit nga balhuganan sa mga badlungon sa katilingban. Sigon sa atong nasayran aduna lamang kini kapasidad sa pagdawat og 250 ka mga piniriso pero sa pagkakaron gipuy-an na kini sa 2600 ka mga piniriso. Sa iyang pangalan di ka makaingon nga adunay suliran kining maong bilanggoan mahitungod sa drugas ug ubang tinonto tungod kay usa kini ka rehabilitation center, pero sa pagkatinood centro kini sa kutay sa mga kontrobersiya, gikan sa palusot sa drugas, mga babayeng mogbog lupad, special treatment sa mga piniriso nga adunahan, pangurakot, pagpaeskapo ngadto na sa mga jail officers nga mga badlungon.

Bisan si kinsa na lamang ang nahimong jailwarden niining maong bilanggoan tungod kay gipangilisan kini sa tingoha nga mahatagan na og kasulbaran ang suliran nga ato nang nahisgutan sa unahan pero hangtod karon ang suliran anaa ra gihapon.

Dili ikalimod nga ang bag-ong jail warden nga si Jail Superintendent Efren Nemeño naningkamot nga masulbad na ang suliran sa corruption ug drugas sulod sa bilanggoan pinaagi sa pagpatuman sa mga bag-ong patakaran nga makakontrolar sa suliran pero kaniadtong Biyernes unom ka mga piniriso ang nakapuga agi sa gabok nga pader nga gihinay-hinayan sa paglungag sa mga pugante.

Ang mga piniriso nakahimo sa pagpuga gumikan sa pagkahanaw ni JO1 Victoriano Bensi sa iyang puwesto hinungdan nga way nakabalda sa mga piniriso sa ilang pag-eskapo. Gumikan ba kaha kay nagbasol o naulaw sa iyang gihimo ug nahadlok sa iyang dangatan, si Bensi matud pa misuway sa paghunos sa iyang kinabuhi.

Naunsa na ba kining BBRC, di na ba gayod mahatagan og kasulbaran kining iyang suliran? Wa kaha maldisyona ning maong bilanggoan?

Sa hisgutanan nga puga, nganong mopuga pa man ang mga piniriso nga unta libre man sila sa pagkaon ug puy-anan, libre pa gyod sa guwardiya? Ang tubag simple lang, kana gumikan kay dili na makatawhanon ang BBRC, dili na kini usa ka dapit nga diin mausab ug mabag-o ang piniriso kon dili nahimo na kining dapit sa kahilayan, drugas, ug corruption. Mananap na ang pagtratar sa mga piniriso diha sa BBRC. Wa ta magsugyot dinhi nga atong trataron nga hari ug rayna ang mga piniriso ug pakan-on nato sila og mga lamiang pagkaon kay basin mosamot sa pagkahoot ang BBRC kay daghan nang magpapriso kay lami ug nindot ang pagkabutang sa mga piniriso. Ang ako lang nga mamahimong makatawhanon ang atong pagtratar ngadto sa mga piniriso.