Kaniadto nilayat sa pader ug gilipat lipat lang ang mga guardya, ang nahitabong pagpuga niadtong miaging semana gihimo sa tumoy sa ilong sa mga 'jailguards'. Ingon ug dili katuhu-an nga gitiltil sa unom ka mga mipuga ang matud pa, gabok nga pader sa Bagong Buhay Rehabilitation Center kon BBRC aron maka-ikyas apan ila kining nahimo samtang nagtanga ug nahinanok ang gidistinong guwardya sa 'tower 2' sa maong bilanggoan. Siguro, nagngisi nga niikyas ang unom sa pagtu-ong nasulod ra sa ilang bulsa ang guwardya nga gisweldohan aron mobantay nila. Posibleng nakatawa ang unom nga ka dako sa BBRC ug kagamhanan sa syudad sa Sugbo ila rang nalutsan ang mga guwardya. Dako ang akong pagtuo nga nasulod sa huna-huna sa mga niikyas atol niadtong mga higayona, nga mas pa silang nahibawo sa mga 'jailguards' nga nagbantay kanila.
Swerte nalang ug nasikop ug balik ang lima sa unom ka mga niiskapo. Nitahan ang uban kanila tungod sa matud pa, grabeng kagutom ug walay kasigurohan sa ilang kinabuhi. Apan wala kini makapapas sa tinuoray nga problema sa BBRC. Ang problema mao nga nagpunsisok na ang libu-an ka mga tawo giingong sad-an sa katilingban sulod sa mao nga bilanggoan. Huyang na ang istraktura sa BBRC ug kinahanglan na og bag-ong edipisyo alang sa mga binilango. Wala pa gihapon matambali ang kalugak sa mga 'jailguards' sa pagbantay sa mga binilanggo. Wala pa matanom sa huna-huna sa tigduma sa bilanggoan nga ang pag-ikyas sa usa ka binilanggo nagpaila kung unsa ka huyang ang siguridad sa usa ka dapit.
Dili siguro ko ninyo mabasol kung magduda ko sa klase sa siguridad nga gipahamtang sa syudad kung mismo ang pagbantay sa mga piniriso dili maatiman. Dili siguro ko ninyo mabasol kung dili ko kontento sa kaistrikto sa siguridad nga gipahamtang sa syudad nga maoy usa sa nakaingon sa pagsulod sa giingong mga terorista. Ang pag-iskapo sa unom ka mga binilanggo maoy usa ka dakong sagpa dili lang alang sa mga taga BJMP apan lakip na sa mga lokal nga opisyal sa syudad.
Matud ni Mayor Tomas Osmeña, bisan pa'g pila ka mga binilango ang moiskapo sa BBRC, wa siya'y planong ibalhin ang bilanggoan sa Barangay Kalunasan. Direkta ug husto ang tubag sa mayor, dili angayang hatagan og solusyon ang usa ka problema og laing problema. Matud sa mayor, dili siya buot nga mabalhin sa Kalunasan ang bilanggoan tungod kay dili siya makatugot nga ang maong lugar na nga mamahimong sentro sa 'illegal drug trade'. Ang BBRC ang matud pa, labing luwas nga lugar alang sa mga durugista ug mga tigpayuhot og illegal nga droga.
Kung aduna may hatagan og pagtagad ug tutukan ang mga hingtungdang ahensya kinahanglan nga ilang tan-awon ang tinud-anay nga motibo ug rason nganong buot moikyas sa usa ka suspetsado nga wala' pa gani madesisyoni ang kaso.
Sa susamang higayon, hapit nako mutuo sa giingon sa mayor nga may kinabuhi pa sulod sa BBRC alang sa illegal nga mga binuhatan kompara sa gawas sa taas nga pader ug talinis nga 'barbed wire'. Matud sa usa sa mga niiskapo, ug sa pipila ka adlaw nitahan ra, nga si Edgardo Mollaneda, ang iyang rason sa pagbalilk sa bilanggoan mao nga kagutom nga iyang nasinati sa gawas. Nagduda lang ko, unsay anaa sa sulod sa maong bilanggoan nga nakapahupay sa kagutom ni Mollaneda nga wa' niya igkita sa gawas.