EDITORYAL - Respeto-an ta ang bandera

Ang Mayo 28 matag tuig gideklarar ubos sa usa ka Executive Order nga Flag Day sa nasud. Karong tuiga, ug sa milabay'ng pipila ka mga tuig, gibaliwala ra ang maong adlaw sa atong katawhan lakip na gani ang mga opisyal sa kagamhanan.

Maynalang nga gipahinumdoman kita sa usa ka sakop sa City Council nga aduna diay Flag Day matag tuig.

Si Konsehal Arsenio Pacana, tsirman sa historical affairs committee sa Konseho, mipasar og resolution diin iyang giawhag ang mga Sugbuanon sa paghatag og bili ug pagrespeto sa atong bandila dili lang atol sa Flag Day kundili usab sa tanang adlaw sa tuig.

Giawhag sa resolusyon ang mga balay patigayon, mga sakyanan ug mga opisina sa pag-display sa Philippine flag gikan Mayo 28 hangtud Hunyo 12 isip kabahin sa pagsaulog sa Independence Day.

Hinaut unta nga ang awhag nga gihimo ni Konsehal Pacana pinaagi sa usa ka resolusyon hatagan og pagtagad sa katawhan ilabi na sa mga opisyales sa gobiyerno.