Tungod sa paa?

Karong naareglo nang kaso tali sa deputized agents sa Land Transportation Office nga mga sakop sa LTO-Capitol ug sa babaye nga ilang gidakop, ang balaod maoy napilde:

• Wa nay naghisgot pasakaan pa bag kaso si Katherine Araneta-Alemania, giingong kawani sa Nestle, nga gipasanginlang nakalapas sa balaod pinaagi sa pagbutang og di maong plaka sa iyang sakyanan, igo na bang silot ang pagpahilak niya atubangan sa daghang mga tawo dihang wa siya magkadimao pagtaod sa tukmang plaka?; ug

• Si Alemania nisibog na sa kaso batok sa siyam ka deputized agents, kansang atraso, kon tuohan ang pasangil sa mga ahente sa National Bureau of Investigation (NBI), mao ang pag-alirong, wa pagtabang ug igo lang paghatag og pliers sa nag-mini skirt nga si Alemania nga nagyaka ug nga nisuway apan napakyas pagtaod sa plaka.

* * *

Klarong gibakwi na sab sa NBI ang mas seryuso nilang pasangil: Nga way katungod ang LTO pag-deputize sa mga sibilyan. Ambot ngano. Nakumbinser ba sa katin-awan ni LTO 7 Director Alex Leyson nga nagikan ni kanhi LTO chief Roberto Lastimoso ang gahom? O nahadlok ang NBI nga mautingkay pagbalik ang ilang makauuwaw nga kasinatian sa ilang kaugalingong civilian agents kaniadto?

Ang kapaspas sa pagkaumol sa areglo, nga nisunod sa init nga pasanginlanay ug hudlatay tali sa duha ka ahensiya, nakapatumaw sa pagduda nga dunay dagkong mga tawo nga nakatabang sa kalit nga pagsabtanay. Ang pagkaapil sa mga anak nilang Filomeno Lim Sr. sa Filipino-Chinese Chamber of Commerce and Industry (FCCCI) ug Robert Go, kanhi presidente sa Cebu Chamber of Commerce and Industry (CCCI) sa mga dinakpan wa katabang sa pagpapas sa sibaw nga pagduda.

* * *

Ang deputized agents igo lang nagtuman sa gituohan nga ilang trabaho. Apan ang kadagkoan sa LTO, ug nahadlok kong hastang ilang mga ginikanan, nidistansiya na sa ilang ka-way batasan. Wa nay bisan usa nga ganahang mopatin-aw nganong giganahan kaayo silang nagtan-aw sa paa ni Alemania.

Si Alemania maoy suwerte. Samtang di kasinahan ang kauwaw nga iyang nahiagoman, ang pagkatanggong sa mga ahente sa NBI sa trapiko nga namugna tungod sa pagkadakop niya maoy nakaluwas niya gikan sa dugang bugalbugal.

Kadudahan hinuon nga kon di pa tinuod ang pasangil nga dakong opisyal sa NBI nadakpan sab ni Joseph Ryan Go sa LTO Capitol pila ka adlaw ang nilabay, tabangan ba nila si Alemania human nitabang pagtan-aw sa iyang paa.

* * *

Makawang ning akong sinuwat kon di hisgutan ang bililhong mga leksiyon nga makuha gikan sa kontrobersiya:

• Angayng papason ang LTO Capitol, bugalbugalon na sa babayeng dinakpan, talawan pa gyod kon NBI nay matsambahan (niangkon nga wa nila tiketi si Atty. Jose Monsanto);

• Mas brayt gihapong NBI, nisugot sa areglo human tanggonga tibuok gabii ang siyam ka deputized agents.

* * *

Email: leo_lastimosa@abs-cbn.com