Ang pag-ebanghelyo uban sa medya

Ang Dios Miingon
May 28, 2006: Solemnidad sa pagsaka sa langit sa atong Ginoo
Mga Pagbasa: Buh. 1:1-11/Ef. 1:17-23/Mk/ 16:15-20

Sa dihang bata pa ko usa ka tim-os nakong pangandoy nga mamahimong Journalist o dili ba kaha reporter. Buot nakong mahatud ang mga mahinungdanong mga impormasyon pinaagi sa pagpadayag niini sa mga nagkadaiyang medium pamantalaan, radyo o dili ba kaha telebisyon. Apan kay lagi, magpari man lagi ta mao nga wala gyud mahimong journalist. Maayo na lang kay nia, nahatagan gayud og luna sa BANAT NEWS. At least partially fulfilled ang maong damgo.

Gamhanan ang medya. It can make and unmake the person ingon pa sa akong professor sa media literacy niadtong college pa ko. Ang nakapait kay ning kapanahonan ta, langawon ang usa ka pamantalaan kon walay mga kontrobersiya, mga krimen, patay ug mga kalaw-ayan nga kaniya atong mapupo. Apan sa laing bahin, kon atong tan-awon ang medya usab maoy gamhanang instrumento sa pag-edukar sa katawhan. Usa kini ka epektibong himan nga maghatag og mga impormasyon sa katawhan aron kini ilang pamalandongan sa dili pa hukman.

Ning Solemnidad sa Pagsaka sa Langit sa atong Ginoo gidapit ug gimandoan kita nga mamahimong mga instrumento ug mga "medya" sa Maayong Balita alang sa kadaghanan. Kay sa pagkatinuod uhaw kaayo ang katilingban sa maayong balita. Bililhon kaayo kining maong tahas. Himuon unta ang media ingon nga instrumento sa pag-ebanghelyo sa katawhan. Labina gyud tingali kanilang mga magtutuo ug katoliko nga anaa sa natad sa Social Communications kay matud pa sa Documents of Social Communications nga giluwatan sa Pontifical Council for Social Communications: 'Therefore the active cooperation of Christians who are professionally competent in this field is a major service to social communication. The excellence which they bring to their professional duty is itself a powerful testimony to Christianity." (no.103).