EDITORYAL – Dalaygon nga buhat sa OFW

Usa ka Cebuana overseas worker nga gipanamastamasan sa iyang amo didto sa Saudi Arabia ang nidaug sa iyang kaso batok sa recruitment agency nga maoy nida niya sa Saudi.

Ang National Labor Relations Commission (NLRC) mi-award kaniya og $2,000 ug P30,000. Ang maong agrabiyadong OFW nangandam na karon sa pagsang-at usab og kaso batok sa iyang Saudi Arabian employer.

Dalaygon kining atong igsuong overseas worker. Dalaygon tungod sa iyang maisugong pagbarug sa iyang katungod. Daghan na kitang nahibaw0ang mga OFW nga nagpakahilom lang ug ila lang gikumkom ang inhustisya nga nahitabo ngadto kanila.

Sumbanan ang iyang gihimo. Sumbanan sa ubang mga dinaugdaug nga OFW. Iyang gihatagan og bili ang panultion nga kanunay libkason ni Dr. Jose Rizal: "Walay daugdaugon kun walay magpadaugdaug."