Anomaliya sa recruitment

Nabisto sa laing higayon ang tinunto sa recruitment sa atong kapolisan human usa ka sakop sa Regional Health Service ang nadakpan atol sa entrapment nga nangilkil og P30 mil gikan sa usa ka police applicant aron pagsiguro nga siya madawat.

Si SPO3 Uldarico Geroy gidakop sa mga sakop sa Regional Intelligence and Investigation Division sud sa usa ka KTV bar diha sa may dalan Sanciangko niadtong Martes sa gabii human masakpi sa akto nga midawat og kwarta gikan sa aplikante.

Ang pagkasikop ni Geroy dili unang higayon nga dunay polis nga nadakpang mipahimulos sa recruitment aron pagpanapi. Niadtong Setyembre 21, 2004 nadakpan sab sa RIID si PO1 Honorato Alilin Jr. nga nadistino niadto diha sa personnel tungod gihapon sa pagpangilkil.

Ang subo nga kamatuoran sa mga anomaliya diha sa recruitment sa atong kapolisan maoy hinungdan nganong dunay mga "scalawags" sa han-ay sa kapolisan nga maoy nakaguba sa reputasyon sa organisasyon.

Ang mas lawom nga imbistigasyon sa pagkasikop ni Geroy angayang himoon sa kadagkuan sa kapolisan dinhi sa rehiyon tungod kay dako ang akong pagtoo nga duna pay laing kauban ang maong polis sa pagpangilkil.

Ang tinuod dugay nakong nakadawat og mga reklamo kabahin sa giingong panapi diha sa recruitment sa atong kapolisan apan way isog sa mga aplikante nga mibarog ug miluwat og affidavit aron sa pagreklamo. Makasabot hinoon ko niini tungod kay gusto silang madawat gyud pagkapolis.

Mao nga bisan og supak sa kabubot-on ang uban mapugos pagbayad aron masiguro nga makasulod, labi pa og mahagbong sa mga requirements. Ang anomaliya diha palang sa recruitment sa atong kapolisan maoy hinungdan nganong dunay batan-on pa nga mga polis nga angayan untang puno pa sa idialismo nalambigit na sab sa pangurakot.

Unsa may imong mapaabot sa usa ka bag-ong polis kon sa iyang pagsud migasto na siya og dako pagpanuborno sa mga opisyal nga nalambigit sa recruitment? Ang dako nga posibilidad nga mahitabo mao nga bawi-on gyud niini ang iyang gasto labi pa og napugos tawon ang iyang pamilya pagpamirinda o ba kaha pagpamaligya og hayopan aron ibayad sa suborno.

Unya asa man niya bawi-on ang iyang nagasto sa suborno nga pila ra may sweldo sa bag-ong polis. Mismo sa gasto sa kaugalingon di na man gani hapit paigo ang sweldo tungod sa kamahal sa mga palaliton karon. Ang mahitabo niini nga mapugos nalang ang uban sa pagsud og illegal.

Mao ni'y hinungdan nganong dunay atong madunggan nga mga polis bisan sa ilang kalinghod pa sa serbisyo nalambigit na sa pagprotehir sa mga illegal nga kalihukan sama sa negosyo sa drugas ug uban pa nga illegal nga mga negosyo.

* * *

Way unod ang pamahayag ni DOJ secretary Raul Gonzales nga tugotan na sa gobyerno nga makahupot og armas ang mga sakop sa media human laing brodkaster didto sa Palawan ang gipatay. Kini tungod may guidelines ang gobyerno nga gihimo aron libre na ang media nga molukat og lisensiya ug permit to carry firearm's outside residence nga dili moagi sa kuti nga proseso.

Si Gonzales mismo maoy miingon nga bisan pa sa iyang pamahayag moagi gihapon ang media sama sa ubang sibilyan sa hustong proseso ug requirements aron sila makakuha og lisensiya ug permit. Unsa man diay kapuslanan sa iyang pamahayag?

Bisan wa man did-i ang media nga makabaton og armas basta kalipikado siya nga mohupot niini. Ambot og nakasabot ba kaha si Gonzales sa iyang gipanulti, o bunga nalang to sa iyang pangidaron hinungdan nga nagpataka nalang siya og buka sa iyang baba.