Bakak ni Brown

Patok sa takilya ang Da Vinci Code. Apan nagpabilin pang nagbarug ang Simbahang Katoliko ug ang Kristohanong mga grupo. Angayng moyukbo silang Dan Brown, Tom Hanks ug Ron Howard sa mga Kristiyanos. Klarong nakatabang ang lapad ug masuk-anong mga protesta batok sa pelikula pagdani sa mas daghang mga tawo pagtan-aw ini.

Ug bisan unsa pa tingali kayawan-on ang producers, kon tinuod mang sungayan ug ikogan sila, wa sab tingali sila mangandoy nga mapukan ug magkatibuwaag ang mga sumusunod ni Kristo. Ang kahugpongan nga nakasugakod sa mas bangis nga pagpanggukod sa nangaging mga siglo, bisan unsa pa kaubos ang pagtan-aw sa kaparian sa ilang mga parokyano, di mahimong mapaluhod sa usa lang ka libro o pelikula.

* * *

Ang Da Vinci Code maoy nitumaw nga labing dakong pelikula sa tibuok kalibotan karong tuiga. Ang iyang kalibotanong kita-P11.4 bilyones-mas dako kay sa higanteng pelikulang Titanic ug nalabwan lang sa Star Wars: Episode III - Revenge of the Sith nga nakatigom og P12.9 bilyones. Ang iyang kita sa US-P3.9 bilyones-nalabwan lang sa Spiderman 2 nga nakahipos og P5.8 bilyones.

Ang Da Vinci, nga nakabawi sa kaluya sa mga takilya sa pagawas sa Mission Impossible III ni Tom Cruise tulo ka semana ang nilabay, nakalabaw sab sa kita sa labing malampusong pelikula nilang Hanks (Castaway, P2B) ug Howard (" Dr. Seuss' How the Grinch Stole Christmas", P2.8B). Apan ang labing dakong ngisi iya ni Brown nga padayong nangolekta sa nagbaha nga halin sa minilyon ka kopya sa iyang libro.

Sa dayag nga tamparos sa simbahan, ang labing dakong kita sa pelikula gikan sa Katolikong mga nasud sa Italya, Espanya ug Latin America.

* * *

Apan sa di pa mag-piyesta sa kadalanan ang mga naghimo sa Da Vinci Code, angay nilang tubagon ang mga bakak sa pelikula nga gibisto di sa Simbahang Katoliko kon dili sa mga batan-ong nisuhid sa mga pangangkon ni Brown nga kamatuoran:

• Ang global positioning system (GPS) di sama kagamay sa baterya sa relo ug di motrabaho sud sa tag-as nga buildings;

• Ang mga pansayan sa Louvre nagamit og liquid soap, di gahi nga mahimong lubngan sa GPS;

• Ang painting nga "Virgin of the Rocks" gibitay sa Grand Gallery, di sa Salle des Etats;

• Ang samang painting may gitas-ong 6.5 feet ug bug-at kayo nga di madaog sa usa lang ka tawo;

• Klarong wa kahibawo si Brown nga ang security system sa Louvre nagamit og security cameras nga gibantayan sud sa 24 oras;

• Ang Wiccan nga gihulagway ni Brown nga karaang relihiyon bag-o lang natukod;

• Ang pyramid nga ganghaan sa Louvre dunay 793 ka bildo, di 666; ug

• Ang Harvard University way professor ni kurso sa symbology.