Angay lamang pasidunggan

Tulo ka Pilipino ang nagdala og garbo sa Pilipinas sa dihang milampos sila pagsaka sa labing taas nga bukid sa kalibotan sa niaging mga adlaw. Ang ilang kalamposan nagpakita lamang sa talagsaong abilidad sa Pinoy sa bisan unsang matang sa paningkamot.

Unang mitungtong sa Mount Everest si Leo Oracion kaniadtong Miyerkules sa hapon ang takna dinhi sa Pilipinas. Siya ang labing unang Pilipino nga mitungtong sa kinatas-ang bukid sa kalibotan.

Sunod nga adlaw, misunod ang lumad nga taga Davao City nga si Erwin Emata pagtungtong sa bukid sa Everest. Dili usab tiaw ang garbo nga gibati sa katawhang Pilipinhon sa iyang kalamposan.

Ug kaniadtong Biyernes sa udto sa oras dinhi sa Pilipinas, si Romeo Gardoce maoy ikatulo nga Pilipino nga nakaabot sa tumoy sa Mount Everest. Ang maong kalamposan sa tulo ka Pilipino nahitabo sulod lamang sa usa ka semana ug nakapaikag sa uban nato'ng kababayan pagsunod sa ilang tunob.

Gani si Miss International Precious Lara Quigaman, sa dihang giinterbiyu siya sa telebisyon, mipadayag usab sa iyang kaikag pagsaka sa bukid sa Everest human sa kalamposan ni Oracion, Emata ug Gardoce.

Sa iyang kalamposan pagsaka sa Everest, miani og mga pasidungog si Oracion. Ang kagamhanan sa dakbayan sa Mandaue misaad og paghatag og pasidungog ngadto kang Oracion, kinsa lumululopyo sa maong siyudad, tungod sa iyang gipakitang talagsaong abilidad pagtadlas sa nagbagang snow arong maabot ang labing taas nga bukid.

Angay gayud nga pasidunggan ang tulo nato ka kababayan nga mipakita sa ilang kaisog pagbutang sa Pilipinas sa mapa pinaagi sa pagpakayab sa bandilang Pilipinhon sa kinatumyan sa Everest. Ang ilang kalamposan usa usab ka kalamposan natong tanang Pilipino nga angay lamang ikapasigarbo sa kalibotan.

Insakto lamang ang lakang ni Senador Ramon "Bong" Revilla Jr. kinsa giingong mosang-at og sugyot sa Senado pagpasidungog nila ni Oracion, Emata ug Gardoce. Gani matud ni Revilla nga kong si Manny Pacquiao miani og daghang pasidungog tungod sa iyang kalamposan sa pamoksing, nganong dili man usab nato pasidunggan ang tulo kinsa mitaya sa ilang kinabuhi aron maabot ang labing taas nga bukid sa kalibotan.

Dili baya tiaw ang naagiang kalisod sa tulo aron lamang maabot ang kinatumyan sa Everest. Kinabuhi ang ilang gitaya aron lamang molampos sila sa ilang tinguha.

* * *

Akong itunol ang akong mainitong pasalamat ngadto sa mga tawong dakog bahin sa akong pagkagapos sa salag sa kaminyoon didto sa Santa Cruz, San Francisco sa isla Camotes sa nakalabay'ng Mayo 13.

Dili unta nako buot nga isulat kini tungod kay usa kini ka personal nga kalamboan sa akong kinabuhi nga dili angay ibulgar. Apan dili usab angay nga palabyon kining higayona aron pagpasalamat niadtong mga dako'g natabang aron molampos ang akong kasal bisan pa man kon gikusokuso kini sa bagyong Caloy.

Hinuon dili ko nalang nganlan kon si kinsa kining mga tawhana tungod sa ka gamay sa atong espasyo. Apan nahibalo na sila kon kinsa sila ug ang ilang dakong natabang sa akong kasal.

Usbon ko, salamat sa inyong dakong tabang!